Самарқанд вилоятининг Тойлоқ туманида ёш онага ўғил фарзандли бўлгани айтилиб, қўлига қизалоқ тутқазилди. Она гумонда қолди, шифокор ва ҳамширалар эса англашилмовчилик бўлган дейишмоқда. «Дарё» мухбири Фарҳод Норбўтаев юзага келган ҳолатни ўрганди.
«Операциядан чиққанимиздан сўнг онанинг аҳволи ҳақида яқинларига хабар бердик. Аёлнинг қайнанаси келини ўғил ёки қизли бўлгани билан қизиқди, — дейди шифокор Бунёд Тоҳиров. — Мен яна бўлимга қайтиб кирдим ва операция бўлимидаги ҳамширадан операция қилинган аёлдан туғилган фарзанд ўғилми, қизми деб сўрадим. Ҳамшира ‘ўғил’ деди. Шундан сўнг чиқиб ўғил чақалоқ туғилибди дедим. Бор гап шу. Ҳамширанинг айтиши бўйича, у олдинги операция йўли билан туғилган болани назарда тутиб ўғил бола деган экан. Шу ерда хатолик кетган».
Фарангиз Облобердиеванинг туғруқ жараёнидаги операциясида иштирок этган ҳамшира Шаҳзода Саломованинг айтишича, 26 июнь куни икки нафар чақалоқ операция йўли билан туғилган. Уларнинг бири тушгача, иккинчиси тушдан сўнг туғилган. Шифокор Бунёд Тоҳиров чақалоқни сўраган вақтда у биринчи операцияда туғилган болага қараётган бўлган ва айнан ўшани назарда тутиб «ўғил» деган.
«Врач-неонатолог билан операция жараёнида қатнашдик. Кейин болани интенсив палатага олиб келдик. Боланинг бўйи ва вазнини ўлчаб ўраб қўйдик. Ўша куни иккита операция бўлганди. Биринчи операция соат 11:00 атрофида бўлиб, унда ўғил чақалоқ туғилганди. Иккинчи операция эса соат 15:30 атрофида ўтказилди. Унда қиз фарзанд дунёга келди. Биринчи операция орқали дунёга келган чақалоқнинг таглигини алмаштираётганимда врач-гинеколог Бунёд Тоҳиров келиб, ‘операция бўлимидаги боланинг жинси нима?’ деб сўради. Мен қўлимдаги болани назарда тутиб, ўғил дедим. Менга ҳеч кимнинг фамилияси айтилгани йўқ», — дейди Шаҳзода Саломова.
Неонатолог шифокор Маҳбуба Ҳотамованинг таъкидлашича, у 28 июнь, якшанба куни навбатчиликка келиб, чақалоқларни қабул қилиб олган.
«‘Интенсивний’да Фарангиз Облобердиеванинг боласи бор экан. Бу нимага ёлғиз ётибди десам, ҳамшира олиб борганини, операциядан сўнг онасининг жони оғригани учун боласини олишни хоҳламаганини айтди, — дейди Маҳбуба Ҳотамова. — Кейин мен бориб аёл билан гаплашиб, қизалоғини олиб келишларини айтдим. У ‘менинг болам қиз эмас, ўғил’ деди. ‘Сизнинг фарзандингиз қиз’ дедим. У менга ‘ўғил’ деди. Бунақа нарса бизларда биринчи марта бўлиши эди. Кейин мен аёлни болакайнинг олдига олиб бориб, қиз эканлигини кўрсатдим. Аммо у ‘менинг болам ўғил бўлиши керак эди’, деди. Чақалоқни онасига олиб бормасдан олдин кўргандим, қизча эди».
Туғруқда иштирок этган шифокорлар ва туман тиббиёт бирлашмаси ходимлари билан суҳбатдан сўнг Фарангиз Облобердиева билан гаплашдик.
Унинг айтишича, ҳомиладорлик пайтида биринчи марта ультратовуш (УЗИ) текширувидан ўтказилганда ҳомила қиз фарзанд эканлигини айтишган. Иккинчи текширувда эса ўғил бола дейишган. Фарангиз Облобердиева ҳамширалар чақалоғини қўлига берганида, ўғил ёки қиз эканлигига қизиқиб кўрмаганини айтди.
«Ўша кyни мени операцияга олиб киришди. Берилган наркоз соат 17:00 таъсирини йўқотди. Фарзандимни эртаси куни бир марта олиб келишди-да, қайтариб олиб кетишди. Учинчи кунга келиб чақалоққа қарайдиган шифокор ‘сизнинг қизчангизни олиб келамиз’ дейишди. Мен фарзандим ўғил эканлигини айтдим. У киши қизча деди. Шундан кейин мен хавфсирадим. Операция бўлган куни ҳушим ўзимда эди. Чақалоқни кўргандим. ‘Полвонча экан’ дейишганди, — дейди Фарангиз Облобердиева. — УЗИга икки марта тушганман. Биринчисида қиз, иккинчисида ўғил деганди. Ўғилча деб эшитганимдан сўнг қизиқиб кўрмаганман мен ҳам. Ҳозир қараётган болам ўша бола. Фақат ўғил-қизлигига иккиланиш бўляпти. Қиз бола ҳам, ўғил бола ҳам фарзанд. Иккиланиш бўлганидан кейин кўнглингиз хотиржам бўлмайди-да».
Шифокорларнинг айтишича, операция йўли билан фарзанд туғган Фарангиз Облобердиева маълум вақтгача ўзига келолмаган.
«Туғилган чақалоқни улар чақириб сўраса айтамиз. Ҳозир карантин вақтида одамлар ичкарига киритилмайди. Шунинг учун ҳам бормаганмиз. Чақалоқни онанинг қўлига соғлиғига қараб берамиз. Айрим болалар жуда ҳам кичик туғилади, уларни вақтинча интенсив палатада сақлаймиз, — дейди шифокор Холида Усмонова. — Ўша куни аёл болага эътибор ҳам бермаган, қарамаган ҳам. Балки ўша куни қараганида шунчалик бўлмасмиди? Мурожаатчилар уч кундан сўнг болани қўлга олдик деб айтишяпти. Аслида бир ярим суткада бола онанинг қўлига берилган. Ундан аввал ҳам олиб борилган. Аммо аёл ўзининг соғлиғини ўйлаб, болага қарамаган ҳам, олмаган ҳам».
Туғруқ куни Фарангиз Облобердиева билан бир палатада бўлган Манзура Раҳмонова билан ҳам суҳбатлашдик. Унинг айтишича, ҳамшира Фарангиз Облобердиевага чақалоғини олиб келиб берган. Аммо у ҳозир болага қараёлмаслигини айтиб, чақалоқни қўлига олмаган.
«Соат 8-9 эди, адашмасам. Чақалоқни олиб келишди. Аммо онаси чақалоққа ‘қаролмайман’ деб қайтариб юборди. Мен ҳеч бўлмаса, сизнинг чақалоғингиз олдимизда бўлса эди, мени чақалоғим битта ўзи қолмасди деб айтдим, — дейди Манзура Раҳмонова. — Она чақалоқни олмади. Қайтариб юборди. Эртаси куни онага мажбуран чақалоқни беришди. Яна олмайман деди».
Самарқанд вилоят соғлиқни сақлаш бошқармаси мазкур ҳолат юзасидан туман ИИБ томонидан терговга қадар текширув ишлари олиб борилаётганини, туман прокуратураси талаби билан чақалоқ ва унинг отасидан қон таҳлили олинганини хабар берди. Унга кўра, ота ва қизнинг қон гуруҳий мансублиги бир хил натижа кўрсатган.
«Шу таҳлилнинг ўзи Ф.Облобердиеванинг фарзанди қиз эканлигини исботлайди. Лекин ота-онанинг бу таҳлилдан кўнгли тўлмаса, ДНК экспертизаси ўтказилиши мумкин», — дейди вилоят соғлиқни сақлаш бошқармаси масъули.
Тойлоқ туман прокуратураси ҳам мазкур ҳолатга ўз муносабатини билдирди.
Таъкидланишича, ҳолатга аниқлик киритиш мақсадида фуқаро А.Ашуров, унинг турмуш ўртоғи Ф.Облобердиева ва туман тиббиёт бирлашмаси туғруқ бўлимида туғилган қиз жинсли чақалоқдан қон намуналари олиниб, уларнинг гуруҳий мансублигини аниқлаш мақсадида суд-биологик экспертизаси тайинланган.
РСТЭИАМ Самарқанд филиалининг 2020 йил 3 июлдаги хулосасига кўра, қиз жинсли чақалоқдан олинган қон намунасида «В» антиген аниқланган. Фуқаро А.Ашуровдан олинган қон намунаси «Ва» (III) гуруҳига мансублиги аниқланган.
Фуқаро А.Ашуров ва Ф.Облобердиеваларнинг қон намуналари қиз жинсли чақалоқ генотипига тўғри келиш-келмаслигини аниқлаш мақсадида Х.Сулаймонова номидаги Республика суд экспертиза марказига одам ДНКсининг суд-биологик экспертизаси тайинланган.Мазкур ҳолат юзасидан туман ИИБ ТБ томонидан терговга қадар текширув ҳаракатлари ўтказилмоқда. Терговга қадар текширув ҳаракатлари устидан прокурор назорати ўрнатилганлиги маълум қилинади.
«Дарё» мавзуга қайтади.
Изоҳ (0)