Тиббиёт фанлари номзоди Фараҳ Фахад тез ва хавфсиз озиш учун аёллар ёшига қараб ўз рационини тўғри ташкиллаштириши кераклигини аниқлади.
Фото: Pixabay
20 ёшда
Агар қалқонсимон без ёки гормонлар билан муаммолар кузатилмаса, бу ёшда метаболизм жуда ҳам яхши ишлайди. 20 яшар қиз тўлишишни бошласа, вазн ташлаш учун организмни зўриқтирадиган парҳез қилиши шарт эмас, шунчаки фаст-фуд, пицца, шўр ва ширин маҳсулотлардан тийилишнинг ўзи кифоя. Уйда табиий маҳсулотлардан тайёрланган таомни истеъмол қилишга ўтиш натижасида ортиқча вазндан тез ва организмни зарарламаган ҳолда халос бўлиш мумкин.
30 ёшда
Метаболизм секинлашиши кузатилади лекин бу овқат ейишни бас қилиш кераклигини билдирмайди. Ўтказилган тадқиқот натижасига кўра, ратционида ёнғоқ, уруғ ва донли маҳсулотлар бўлган аёллар тез вазн ташлаши мумкин. Шифокорлар ушбу ёшда қуйидаги схемага амал қилишни маслаҳат беради: бир кун фақат салат ва кўкатлар истеъмол қилишни, бир кун ёғсиз маҳсулотлар, яна бошқа бир кун ҳеч нарсадан чекланмаслик, енгил тамадди учун эса донли маҳсулот ва ёнғоқлар истеъмол қилиш тавсия қилинади.
40 ёшда
Метаболизмнинг секинлашиши оқибатида организм оғир овқатни ҳазм қилиши қийин бўлади. Шу сабабдан, ҳазм жараёни ҳамда организмдан ёғ ажралиб чиқишини тезлаштириш хусусиятига эга бўлган, клетчаткага бой таомларни истеъмол қилиш муҳим саналади. Шунингдек, хамир ва крахмалли таомларни иложи борича емаслик керак. Нонуштага бўтқа, тушликка сабзавотлардан тайёрланган шўрва, кечки овқатга эса ёғсиз дудланган балиқ ёки товуқ гўшти билан сабзавотли гарнир энг аъло вариант.
50 ёшда
Ушбу ёшда оқсилга бой парҳез қилиш тавсия қилинади. Мушаклардаги массаларни йўқотмаслик учун оқсил истеъмоли зарур ҳисобланади ва шу билан бирга витамин ва минералларни ҳам рационга киритиш керак. Гап шундаки, ёш ўтгани сари организмда витамин ва микроэлементлар етишмовчилиги кузатилади ва шу боисдан ҳам кўпчилик уларни таблетка кўринишидагисини қабул қилади. Ушбу жараёнда организмни зўриқтирмаслик учун мутахассислар мазкур ёшда шошмасдан, эҳтиёткорлик билан бир ойда 2-3 килодан кўп вазн ташламасдан парҳез қилишни тавсия қилади.
