Спорт арбитраж суди (CAS) «Манчестер Сити»нинг Еврокубокларда иштирок этиши тўғрисида ижобий қарор чиқарди.
Арбитраж суди Англия клуби томонидан берилган апелляция шикоятини қаноатлантирилди ва клубнинг келаси мавсумда Чемпионлар Лигасида ўйнаши мумкинлигини билдирди. Қайд этиш жоиз, «шаҳарликлар» аллақачон Еврокубокларда иштирок этишни кафолатлаб қўйган. Жамоа Англия Премьер Лигасида 72 очко билан 2-ўринни эгаллаб турибди.
Эслатиб ўтамиз, 2020 йил февралида УЕФА молиявий фейр-плей қоидаларини бузгани учун «Манчестер Сити»ни Еврокубоклардан икки йилга четлатиб, 30 миллион евро миқдорида жаримага ҳам тортганди.
Спорт арбитраж суди жаримани ўз кучида қолдирди, бироқ уни 30 миллиондан 10 миллион еврога қисқартирди.
Маълумот учун, Пеп Гвардиола шогирдлари Чемпионлар Лигасининг 2019/20 йилги мавсум 1/8 финалида Мадриднинг «Реал»ига тўқнаш келган. Жамоа илк учрашувни сафарда ўтказиб, Мадрид клуби устидан 2:1 ҳисобида ғалаба қозонган. Жавоб беллашуви эса Манчестерда 8 август куни бўлиб ўтади. Ўйин мухлисларсиз ўтказилади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)