Испаниянинг «Кадис» клуби 14 йил ичида илк марта Ла Лига йўлланмасини қўлга киритди.
40-турдан сўнг жамоа 69 очко тўплаган ҳолда, Сегундада (нуфузи бўйича Испанияда Ла Лигадан кейин 2-ўринда турадиган футбол мусобақаси) пешқадамлик қилмоқда. 2-поғонада эса 64 очко билан «Уэска» бормоқда.
Мусобақа якунланишига 2 тур қолганида «Кадис» ўзи учун 2-ўриндан паст бўлмаган поғонани кафолатлаб қўйди. Қайд этиш жоиз, клуб охирги марта юқори дивизионда 2005/2006 йилги мавсумда иштирок этган.
«Кадис» президенти Мануэль Вискайнонинг сўзларига кўра, клуб Ла Лиганинг кейинги мавсумида иштирок этиш учун биринчи харидни амалга оширган. Клуб «Реал» ва Испания терма жамоасининг собиқ ҳужумчиси Альваро Негредони ўз сафига қўшиб олган. Ҳозирда Негредо «Ан-Наср» (Саудия Арабистони) шарафини ҳимоя қилмоқда.
«Жамоамиз Ла Лигадаги биринчи трансферини амалга оширди, бу — Альваро Негредо», — дейди Вискайно.
Маълумот учун, Негредо 2018 йилдан бери «Ан-Наср» клуби шарафини ҳимоя қилиб келади. У Мадриднинг «Реал» клуби тарбияланувчиси ҳисобланади. Бундан ташқари, 34 ёшли ҳужумчи вақтида «Севилья» ва «Манчестер Сити» сингари клубларда тўп сурган. Испания терма жамоаси сафида эса у 21 та ўйин ўтказиб, 9 та гол урган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)