«Андижон» клуби катта мураббийи Диёр Мирзабоев Coca-Cola Суперлига 9-тури доирасида «Сурхон»га қарши кечган ўйиндан (0:1) сўнг ўз фикрлари билан ўртоқлашди.
«Биринчи бўлим тўлиқ «Сурхон» жамоаси устунлигида ўтди. Иккинчи бўлимда ҳимоячимиз четлаштирилди. Бир нарсага тушунмадим, биринчи бўлиб гол ўтказиб юборсак ёки бир киши кам бўлиб қолсак жамоа яхши ўйнайди, шекилли. Биз мураббийларнинг айбими ёки бошқа сабабми футболчиларда иштиёқ кўринмади, уларнинг кўзи ёнмади. «Сурхон» жамоасини адолатли ғалаба билан табриклайман.
Нима сабабдан беш нафар ҳимоячи билан ўйнадик? Бу саволни бош мураббийга (Виктор Кумиков — изоҳ «Дарё») беришимиз керак. Ҳозирги кундаги ҳолатимиздан келиб чиқиб ҳимоявий ўйин кўрсатяпмиз. Чунки, иккита марказий ҳимоячи билан ўйнасак рақиблар кўпроқ ҳужум уюштирмоқда. Шуни олдини олган ҳолда, ҳимоявий ўйин намойиш этяпмиз», — дея Мирзабоев сўзларини келтирмоқда «Championat.asia».
9-турдан сўнг «Андижон» 5 очко билан 12-поғонада кетмоқда. Кейинги турда жамоа «Машъал» билан баҳс юритади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)