Ўзбекистонда 11 июль соат 23:30 дан 12 июль соат 23:30 га қадар коронавирус юқтириб олиш билан боғлиқ 484 та ҳолат қайд этилди. Бир кун олдинги антирекорддан 2 та кам ҳолат қайд этилди. Кетма-кет бешинчи кун янги касалланиш ҳолатлари 400 тадан кўп бўлмоқда. Янги ҳолатлардан сўнг Ўзбекистонда коронавирусга чалинганлар сони 12 997 нафарга етди.

Фото: Telegram / @ssvmatbuotkotibi

Янги касалланиш ҳолатлари

Янги касалланганларнинг

  • 219 нафари карантин муассасаларида (хориждан келиб карантинга олинганлар — 174 нафар, Наманган вилоятида — 17 нафар, Самарқанд вилоятида — 17 нафар, Андижон вилоятида — 11 нафар);
  • 265 нафари аҳоли орасида (Тошкент шаҳрида — 240 нафар, Андижон вилоятида — 17 нафар, Наманган вилоятида — 8 нафар).

Кун давомида 5 та ҳудудда янги касалланганлар қайд этилди. Ушбу ҳудудларнинг 3 тасида аҳоли орасида ҳам коронавирус аниқланди. Аҳоли орасида 265 та янги касалланиш ҳолати кузатилди. Аввал ҳеч қачон аҳоли орасида бунча кўп касалланиш ҳолати кузатилмаган. Бу антирекорд. Бунгача аҳоли орасидаги энг кўп касалланиш ҳолати 10 июль куни кузатилганди, ўша куни аҳоли орасидаги 195 кишида касаллик аниқланган.

Тошкент шаҳрида аниқланган 240 та ҳолатнинг барчаси аҳоли орасида қайд этилди. Бу кўрсаткич ҳам антирекорд ҳисобланади. Илгари Тошкент шаҳрида кунлик касалланиш ҳолатлари ҳам 200 тадан ошмаганди, аҳоли орасидаги ҳолатларни гапирмаса ҳам бўлади. Пойтахтда бунгача энг кўп касалланиш ҳолати 7 июнь куни қайд этилган бўлиб, ўша куни 195 кишида касаллик аниқланганди. 9—12 июль кунлари Тошкент шаҳрида аниқланган касалланиш ҳолатларининг 599 таси аҳоли орасида ва бор-йўғи 8 таси карантиндагилар орасида қайд этилди.

Андижон вилоятида аниқланган 28 та ҳолатдан 11 таси коронавирусга чалинганлар билан мулоқотда бўлиб, карантинга олинган фуқаролар орасида, 17 таси эса аҳоли орасида қайд этилди. Июль ойи Андижонда энг кўп коронавирус беморлари аниқланган ой бўлди. 1 июлдан бери вилоятда 175 кишида касаллик аниқланди. Ушбу ҳолатларнинг 43 таси аҳоли орасида қайд этилди.

Наманган вилоятида қайд этилган 25 та ҳолатдан 17 таси карантиндагилар орасида, 8 таси аҳоли орасида аниқланди. Наманганда май, июнь ва июль ойларида бир кунда 25 кишида касаллик ҳозирча қайд этилмаганди, лекин 9 ва 10 июль кунлари 24 тадан ҳолат аниқланганди. Наманган вилояти Тошкент шаҳри, Бухоро ва Самарқанд вилоятларидан сўнг касалланганлар сони 400 нафардан ошган тўртинчи ҳудуд бўлди. Июль ойининг ўзида Наманганда коронавирусга чалинганлар сони 103 нафарга (25 фоиз) кўпайди.

Самарқанд вилоятида коронавирусга чалинганлар билан мулоқотда бўлиб, карантинга олинган фуқаролар орасида 17 кишида касаллик аниқланди. Самарқандда 5 кундан буён узлуксиз равишда янги касалланиш ҳолатлари кузатилмоқда. Ҳозирда Самарқанд Тошкентдан сўнг касалланганлар сони 600 нафарган ошган иккинчи ҳудуд бўлди. Июль ойида Самарқанд касаллар сони бўйича Бухородан ўтиб кетди. 12 кун ичида Самарқандда 154 кишида коронавирус қайд этилди.

Тошкент вилоятида июль ойининг бошидан 7 июлгача аҳоли орасида 78 кишида касаллик аниқланди. Бироқ шундан сўнг ҳозиргача аҳоли орасида ҳам, коронавирусга чалинганлар билан мулоқотда бўлиб, карантинга олинганлар орасида ҳам янги ҳолатлар қайд этилмади. Тошкент вилоятида 7 июлдан сўнг фақат хориждан келиб карантинга олинганлар ва халқаро юк ташувчи машина ҳайдовчилари (булар ҳам аслида хориждан келган) орасида коронавирус аниқланмоқда.

Ўлим ҳолатлари ва аҳволи оғир беморлар

12 июль куни Тошкент шаҳрида яшовчи уч аёлнинг коронавирус асоратларидан вафот этгани ҳақида хабар берилди. Кетма-кет уч кундан буён 3 нафардан беморнинг вафот этаётгани ҳақида хабар берилмоқда.

Биринчи ўлим. Тошкент шаҳрининг Олмазор туманида яшаган 53 ёшли М.К. исмли аёл Тошкент тиббиёт академиясининг кўп тармоқли клиникасида даволанган (вазирлик ахборотида аёл айнан қачон касалхонага жойлаштирилгани айтилмаган). Унга COVID-19 оғир кечиши, икки томонлама пневмония ташхиси қўйилган.

Аёл шунингдек, юрак ишемик касаллиги, стенокардия, гипертония ҳамроҳ касалликлари билан оғриган. Хасталик ўткир нафас ва юрак қон-томир етишмовчилиги асоратлари билан кечган.

Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак қон-томир етишмовчилигидан вафот этди. 53 ёшли аёл коронавирус асоратларидан вафот этган Тошкент шаҳридаги 32, Ўзбекистондаги 58-бемор бўлди.

Иккинчи ўлим. 7 июль куни Чилонзор туманида яшовчи 76 ёшли V.Т. исмли аёл ва унинг ўғлида коронавирус тасдиқланганидан сўнг уйига махсус тез тиббий ёрдам гуруҳи келган. Аммо беморда касаллик белгилари бўлса-да, шифохонада стационар ҳолатда даволаниш рад этилган, дея хабар бермоқда Соғлиқни сақлаш вазирлиги.

11 июль куни беморнинг аҳволи оғирлашганлиги сабабли Зангиота туманидаги юқумли касалликлар шифохонасига ётқизилган. У ерда унга COVID-19’нинг оғир кечиши, икки томонлама пневмония ташхиси қўйилган.

Беморда юрак ишемик касаллиги, зўриқиш стенокардияси, гипертония касаллигининг 2-даражаси, юрак ва бош мия томирлари атеросклерози, дисциркулятор энсефалопатиянинг 2-даражаси, 12 бармоқли ичак яраси касаллиги каби ҳамроҳ касалликлари бўлган.

Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак қон-томир етишмовчилигидан вафот этди. 76 ёшли аёл коронавирус асоратларидан вафот этган Тошкент вилоятидаги иккинчи, Ўзбекистондаги 59-бемор бўлди.

Учинчи ўлим. Тошкент шаҳрининг Олмазор туманида яшовчи 65 ёшли М.Х. исмли аёлда сўнгги икки ҳафтада тана ҳароратининг кўтарилиши, ҳолсизлик, йўтал кузатилиб, уйида даволанган. Тана ҳарорати тушмагач, COVID-19 инфекциясига намуна топширган.

Бемор Зангиота туманидаги юқумли касалликлар шифохонасига ётқизилган. Унга COVID-19 инфекцияси оғир кечиши, икки томонлама пневмония, нафас ва ўткир юрак қон-томир етишмовчилиги ташхиси қўйилган. Шунингдек, юрак ишемик касаллиги, гипертония, артериал гипертензия ҳамроҳ касалликлар билан ҳам оғриган.

Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак қон-томир етишмовчилигидан вафот этди. 65 ёшли аёл коронавирус асоратларидан вафот этган Тошкент вилоятидаги учинчи, Ўзбекистондаги 60-бемор бўлди.

Айни пайтда тиббиёт муассасаларида даволанаётган беморлардан 43 нафари оғир, 7 нафари эса ўта оғир аҳволда.

Касалликдан даволаниш

Ўзбекистонда айни вақтда коронавирусдан даволанаётган беморлар сони биринчи марта 5 мингдан ошди. Апрель ойининг иккинчи ярмида шифохоналардаги беморлар сони 1300 нафардан кўп бўлганди. Шундан сўнг соғайганлар сони янги касалланганлар сонидан кўпайиши ортидан шифохонадаги беморлар сони камая бошлади. 28 апрель куни беморлар сони 1000 нафардан камайди, 18 майда эса 464 нафар бемор қолганди. Даволаниш кўрсаткичи 82 фоизга етиб, коронавирусдан холи ҳудудлар сони ҳам ошиб бораётганди.

Карантин чекловлари енгиллаштирилиб, хориждан чартер рейслар сони кўпайтирилгач, беморлар сони ҳам кўпайишни бошлади. Ҳозирда касаллик қайд этилган 5085 киши шифохоналарда ва уй шароитида коронавирусдан даволанмоқда.

Шу билан бирга, ушбу беморларнинг қанчасида касаллик аломатсиз кечаётгани ҳам маълум қилинмаган. Маълумот учун, 5 июлдан бошлаб Ўзбекистонда коронавирус инфецияси аломатсиз кечаётган беморлар уй шароитида даволаниши мумкин, ушбу йўналишда йўриқнома ва эслатмалар ҳам эълон қилинган.

12 июль давомида 129 нафар бемор коронавирусдан соғайди. Улардан 121 нафари Тошкент шаҳри, 4 нафари Қорақалпоғистон Республикаси, 3 нафари Бухоро ва 1 нафари Навоий вилоятларидаги тиббиёт муассасаларида шифо топди. Тошкентда касалликдан соғайганлар сони 5 мингдан ошди.

Ҳозирда касаллик қайд этилган жами 12997 нафар бемордан 7852 нафари соғайиб, даволаниш кўрсаткичи 60 фоизни ташкил этмоқда. Уч кундан буён бу борадаги кўрсаткичлар 1 фоиздан тушиб бормоқда. Охирги марта 2 май куни даволаниш кўрсаткичи 60 фоиз бўлганди.

Карантиндагилар

Ҳозирда Ўзбекистонда уй карантинида 50 253 нафар, стационар карантинда эса 25 482 нафар фуқаро тиббий кузатувда бўлиб турибди. 7 июлдан бери биринчи марта карантиндагилар сони ҳақида маълумот берилди. Охирги икки ой ичида уй карантинидагилар сони биринчи марта 50 мингдан ошди.