Сурхондарё вилоятининг Ангор туманига янги ҳоким тайинланди. Бу ҳақда «Дарё»га маълум қилган вилоят ҳокимлиги ахборот хизмати раҳбари Заҳириддин Тўраевнинг таъкидлашича, ушбу лавозимга вилоят иқтисодий тараққиёт ва камбағалликни қисқартириш бош бошқармаси бошлиғи биринчи ўринбосари сифатида ишлаб келган Шоҳжаҳон Абдуллаев муносиб кўрилган.
Таъкидланишича, ушбу масала юзасидан Халқ депутатлари Ангор тумани кенгашининг навбатдан ташқари сессияси 11 июль, шанба куни бўлиб ўтган. Сессияда карантин қоидаларига амал қилган ҳолда Zoom дастури орқали вилоят ҳокими Тўра Боболов ҳам иштирок этиб, туманни ижтимоий-иқтисодий ривожлантириш, мавжуд имконият ва ресурслардан самарали фойдаланиш борасида фаоллар олдида турган долзарб вазифалар ҳақида сўз юритган.
Сессия ишида Ангор тумани ҳокими сифатида ишлаб келган Усмон Туропов вилоят ҳокимининг қишлоқ ва сув хўжалиги масалалари бўйича ўринбосари этиб тайинланганлиги муносабати билан лавозимидан озод қилингани, ўрнига Шоҳжаҳон Абдуллаев ҳоким этиб тасдиқланиши масаласи кўриб чиқилган.
Маълум қилинишича, Шоҳжаҳон Абдуллаев 1987 йил Олтинсой туманида туғилган бўлиб, 2009 йилда Термиз давлат университетини, 2020 йилда Ўзбекистон Президенти ҳузуридаги Давлат бошқаруви академиясини тамомлаган.
Меҳнат фаолияти давомида вилоят иқтисодиёт бош бошқармаси бўлим бошлиғи, бошқарма бошлиғи ўринбосари, Шўрчи туман ҳокимининг биринчи ўринбосари, вилоят иқтисодиёт ва саноат бош бошқармаси бошлиғи, 2020 йил бошидан вилоят иқтисодий тараққиёт ва камбағалликни қисқартириш бош бошқармаси бошлиғининг биринчи ўринбосари лавозимларида ишлаб келган.
Заҳириддин Тўраевнинг қўшимча қилишича, 11 июль куни Қизириқ туманига ҳам янги ҳоким тайинланади.
Изоҳ (0)