« Akfa университетининг моддий-техник базасини мустаҳкамлаш бўйича қўшимча чора-тадбирлар тўғрисида»ги қарор лойиҳаси муҳокамага қўйилгани ҳақида хабар берилганди. Монополияга қарши курашиш қўмитаси мазкур қарор лойиҳасининг айрим бандлари «Рақобат тўғрисида»ги қонун ва бир қатор Президент қарорлари талабларига зид келишини маълум қилди.
Соғлиқни сақлаш вазирлиги томонидан Норматив-ҳуқуқий ҳужжатлар лойиҳалари муҳокамаси порталига қўйилган Ўзбекистон Республикаси Вазирлар Маҳкамасининг Akfa университетининг моддий-техник базасини мустаҳкамлаш бўйича қўшимча чора-тадбирлар тўғрисидаъги қарори лойиҳаси Монополияга қарши курашиш қўмитаси томонидан Адлия вазирлигида 2019 йил 19 апрелда 3155-сон билан рўйхатга олинган қонун ҳужжатларининг рақобатга таъсирини баҳолаш методикаси асосида кўриб чиқилган», — дейилади қўмита хабарида.
Қайд этиш жоизки, Соғлиқни сақлаш вазирлиги томонидан муҳокамага қўйилган мазкур ҳужжат Президенти қарори лойиҳаси ҳисобланади. Монополияга қарши кураш қўмитаси эса ўз хулосасида мазкур ҳужжатни Вазирлар Маҳкамаси қарори лойиҳаси деб атаган.
Лойиҳанинг 2-бандида Тошкент вилоят ҳокимлиги, Ер ресурслари, геодезия, картография ва давлат кадастри давлат қўмитаси билан биргаликда бир ой муддатда университетга замонавий ўқув бинолари, ўқув-амалиёт бинолари, кампуслар, спорт иншоотлари қуриш ва жиҳозлаш учун Тошкент вилояти, Қибрай тумани, «Ўнқўрғон» ҚФЙ, «Парвоз» МФЙ ҳудудида жойлашган «Манзарали боғдорчилик ва гулчилик» МЧЖ балансида бўлган 29,48 гектар ер майдонини доимий фойдаланишга ажратиб бериш кўзда тутилган. «Манзарали боғдорчилик ва гулчилик» МЧЖга қарашли мулкларни бузиш, дарахт кўчатларини Тошкент шаҳрига экиш учун кўчириш ишларини Тошкент шаҳар ҳокимлигига юклаш режалаштирилган.
Қўмита хулосасида қайд этилишича, 2018 йил 20 апрелдаги «Тадбиркорлик ва шаҳарсозлик фаолиятини амалга ошириш учун ер участкаларини доимий фойдаланишга бериш тартибини тубдан такомиллаштириш чора-тадбирлари тўғрисида»ги ПҚ-3677-сонли қарорининг 1-бандига асосан 2018 йил 1 июлдан бошлаб юридик ва жисмоний шахсларга тадбиркорлик ва шаҳарсозлик фаолиятини амалга ошириш учун ер участкаларини доимий фойдаланишга бериш «E-ijro auksion» ягона электрон савдо майдончасида электрон аукцион орқали амалга ошириш тартиби ўрнатилган.
Шунингдек, қарор лойиҳасининг 4-бандида Вазирлар Маҳкамасининг 2019 йил 15 февралдаги «Akfa университетини ташкил этиш тўғрисида»ги 130-сон қарори билан университетга белгиланган шартлар ҳамда имтиёзлар муҳокама қилинаётган ушбу қарор кучга киргандан бошлаб 3 йил муддатга тўлиқ қўлланиши кўзда тутилган. Бундан ташқари, лойиҳада истисно тариқасида, университетга 2021 йил 1 апрелга қадар қурилиш ишларини лойиҳа-смета ҳужжатларини ишлаб чиқиш билан бир вақтда олиб бориш ҳамда лойиҳа ҳужжатларини дунёнинг илғор (Жанубий Корея, Германия, Туркия) давлатлари қурилиш нормалари асосида амалга оширишга рухсат берилиши белгиланган.
Монополияга қарши кураш қўмитаси мазкур имтиёзларни бериш масаласида ўз хулосасини баён қилди. Унга кўра, «Рақобат тўғрисида»ги қонунининг 12-моддасига мувофиқ, давлат бошқаруви органлари ва маҳаллий давлат ҳокимияти органларининг айрим хўжалик юритувчи субъектларга уларни товар ёки молия бозорида фаолият кўрсатаётган бошқа хўжалик юритувчи субъектларга нисбатан афзал ҳолатга қўядиган имтиёзлар, преференсиялар ва енгилликларни асоссиз равишда бериши тақиқланиши кўрсатилган.
Бундан ташқари, Президентининг 2018 йил 31 майдаги «Имтиёзлар ва преференсиялар бериш тартибини тубдан такомиллаштириш чора-тадбирлари тўғрисида»ги ПҚ-3756-сонли қарорига асосан солиқ ва божхона имтиёзлари ҳамда преференсиялар қонунлар ва Ўзбекистон Президенти ҳужжатлари билан умуман тармоқлар, фаолият соҳалари, ҳудудлар учун берилади. Вақтинчалик имтиёзлар Ўзбекистон Президенти ҳужжатлари билан 3 йилдан ортиқ бўлмаган муддатга берилади, индивидуал имтиёзлар, алоҳида ҳолларда, хусусий сектор инвестиция киритишдан манфаатдор бўлмаган тармоқларда ижтимоий аҳамиятга эга лойиҳаларни амалга ошириш учун, аниқ ижтимоий ёки иқтисодий асослар мавжуд бўлганда ёхуд Ўзбекистоннинг халқаро шартномаларига мувофиқ, Президент ҳужжатлари билан тақдим этилади.
Қўмитанинг билдиришича, Akfa университетига имтиёз бериш таълим бозорида фаолият олиб бораётган бошқа хусусий таълим муассасаларига нисбатан устунлик берилишига олиб келади ва рақобат муҳитига салбий таъсир кўрсатади. «Ушбуларни инобатга олиб, қарор лойиҳасининг 4-банди иккинчи ва тўртинчи хатбошиларни чиқариб ташлаш лозим. Шунингдек, қарор лойиҳасини амалдаги қонунчилик талабларига мослаштириш зарур ҳисобланади», — дейилади қўмита хулосасида.
«Мазкур қарор лойиҳасининг қабул қилиниши оқибатида бошқа хўжалик юритувчи субъектларга нисбатан афзал ҳолатга қўядиган имтиёзлар, преференсиялар ва енгилликлар берилиши «Рақобат тўғрисида»ги қонуннинг 12-моддаси, 2017 йил 8 сентябрдаги ПФ-5185-сон фармони билан тасдиқланган Ўзбекистон Республикасида Маъмурий ислоҳотлар концепциясига, Президентнинг 2018 йил 31 майдаги ПҚ-3756-сонли қарори талабларига зид эканлигини инобатга олиб, қарорни мазкур қонунчилик ҳужжатлари талабларига мослаштирилгандан сўнг қабул қилиниши мақсадга мувофиқ ҳисобланади», — дея хулоса қилган қўмита.
Аввалроқ Монополияга қарши курашиш қўмитаси Ўзбекистонда қатор корхоналарга эксклюзив имтиёзлар бериш ҳуқуқини бекор қилишни кўзда тутувчи Президент фармони лойиҳасини муҳокамага қўйганди. Фармон лойиҳасида Akfa университетига берилган солиқ ва божхона имтиёзларини бекор қилиш кўзда тутилган.
Изоҳ (0)