Зарафшон шаҳар ҳокими ўринбосари икки фуқарога ишдан бўшатиш нафақаси тўланмагани ортидан маъмурий жаримага тортилди. Бу ҳақда «Xabar.uz» хабар берди.
Маълум қилинишича, Зарафшон шаҳрида 18 йил давомида ишлаб келган Насиба Ҳалилова лавозими қисқартирилгани сабабли ишдан кетган. Аёлнинг 5 нафар фарзанди бор, қўшимча даромади йўқ. Ишдан кетганидан кейин, ташкилотдан қонуний тарзда бериладиган пулларга бир-икки ой рўзғорини тебратиб туришни режалаштирган. Лекин вазият бундай бўлмаган. Аёл ишдан бўшаш ҳақида ариза ёзганидан сўнг ҳам унинг ишхонаси ҳеч қандай қўшимча пул тўлаб бермаган. Унинг меҳнат дафтарчаси эса 2 ҳафтадан кейин берилган.
Нашрнинг ёзишича, ана шундай ҳолат яна бир фуқаро Салима Ҳамроева билан ҳам юз берган. Фуқароларнинг Зарафшон шаҳар адлия бўлимига мурожаатидан сўнг вазиятга ойдинлик киритилган.
Маълум бўлишича, мазкур фуқаролар билан тузилган меҳнат шартномаси 2020 йилнинг 20 апрелида 12-сонли буйруқ асосида бекор қилинган. Аммо Меҳнат кодексига асосан ходимга шу куннинг ўзида берилиш керак бўлган буйруқ нусхаси ва меҳнат дафтарчаси уларга орадан 2 ҳафта ўтгандан сўнг, яъни 2020 йилнинг 6 май куни тақдим этилган. Натижада ходимларнинг моддий ёрдам бўйича қўшимча кафолат олиш ҳуқуқлари бузилган ҳамда уларга иш берувчи томонидан ишдан бўшатиш нафақаси ҳам тўлаб берилмаган.
Фуқаролар шу даврга қадар ҳам ана шу масала юзасидан бир қатор ташкилотларга мурожаат қилган. Оворагарчиликларга қарамасдан, аёлларнинг мурожаатлари қаноатлантирилмаган. Аммо, адлия бўлими аралашувидан сўнг, ходимларга жами 11,2 миллион сўм пул маблағлари ундириб берилган.
Мазкур масала ечимида сусткашликка йўл қўйиб, меҳнат қонунчилигини бузганлиги учун Зарафшон шаҳар ҳокими ўринбосари ҳамда шаҳар маҳалла ва оилани қўллаб-қувватлаш бўлими бошлиғига нисбатан маъмурий жарима қўлланилган.
Изоҳ (0)