Андижон вилояти Асака туманида тўрт нафар йигит 17 ёшли ўсмирнинг йўлини тўсиб, унинг ёнида бўлган 430 минг сўм пулини олиб қўйди. Бу ҳақда Тергов департаменти хабар берди.
Маълум қилинишича, 3 июль куни соат 14:00 да 19 ёшли М.А. ва А.С. 21 ёшли Б.О., 20 ёшли С.П. бир гуруҳ бўлиб, Асака тумани «Улуғбек» МФЙ ҳудудида кетаётган вояга етмаган 17 ёшли Т.М.ни тўхтатган. Шундан сўнг улар ўсмирни Nexia’да ҳеч ким йўқ жойга олиб борган ҳамда пичоқ ва таёқ билан қўрқитиб, унга тегишли бўлган 430 минг сўм пулни олиб қўйган.
Мазкур ҳолат юзасидан Асака туман ИИБ ҳузуридаги Тергов бўлими томонидан жиноят иши қўзғатилиб, мазкур тўрт фуқаро процессуал тартибда ушланиб, дастлабки тергов ҳаракатлари олиб борилган.
Дастлабки тергов жараёнида С.П.дан бир дона пичоқ ва бир дона ёғочдан ишланган таёқ процессуал тартибда расмийлаштирилиб олинган.
Жиноят иши бўйича М.А., Б.О. ва С.П.га Жиноят кодексининг 164-моддаси 3-қисми «а» ва «б» бандларига (Қурол ёки қурол сифатида фойдаланиш мумкин бўлган бошқа нарсаларни ишлатиб, бир гуруҳ шахслар томонидан олдиндан тил бириктириб содир этилган босқинчилик), А.С.га нисбатан эса 164-моддаси 3-қимси «а» бандига (Такроран ёки хавфли рецидивист томонидан содир этилган босқинчилик) айб эълон қилиниб, уларга нисбатан қамоққа олиш тарзидаги эҳтиёт чораси қўлланилган. Ҳозирда тергов ҳаракатлари давом эттирилмоқда.
Изоҳ (0)