2020 йил 8 июль куни Ҳиндистон Ташқи ишлар вазирлигида Ўзбекистон элчиси Дилшод Ахатовнинг Ҳиндистон президенти Рам Натҳ Ковиндга ишонч ёрлиқларини топшириш маросими бўлиб ўтди, деб хабар бермоқда Ташқи ишлар вазирлиги ахборот хизмати.
Видеоконференцалоқа шаклида ўтказилган суҳбатда Ҳиндистон президенти икки ва кўп томонлама шаклларда, шунингдек, COVID-19 тарқалишига қарши курашдаги самарали ҳамкорликни қайд этган.
Суҳбатда икки мамлакат ўртасида инвестиция, қишлоқ хўжалиги, таълим, маданият ва бошқа соҳаларда ўзаро манфаатли ва самарали ҳамкорлик жадал ривожланиб бораётгани таъкидланган.
Ҳиндистон раҳбари 2021—2022 йилларда БМТ Хавфсизлик кенгашининг доимий бўлмаган аъзолигига Ҳиндистон номзодини қўллаб-қувватлагани учун Ўзбекистонга самимий миннатдорлик изҳор этиб, халқаро ташкилотлар доирасида конструктив ҳамкорликни янада ривожлантиришга ишонч билдирган.
Рам Натҳ Ковинд Шавкат Мирзиёевнинг 2018 йил 30 сентябрь – 1 октябрь кунлари Ҳиндистонга давлат ташрифи чоғида бўлиб ўтган учрашувни самимий қайд этиб, давлат раҳбарига чуқур ҳурмат ва энг яхши тилакларини изҳор этди, дейилган ТИВ хабарида.
2020 йил 1 июль куни Ўзбекистон Республикаси ташқи ишлар вазири Абдулазиз Комилов Ҳиндистон Республикасининг мамлакатимиздаги дипломатик миссиясини якунлаётган фавқулодда ва мухтор элчиси Сантош Жа билан видеоконференция шаклида учрашув ўтказгани, суҳбат сўнгида Абдулазиз Комилов Сантош Жага икки мамлакат ўртасидаги ҳамкорликни ривожлантириш ва мустаҳкамлашга қўшган шахсий ҳиссаси учун миннатдорлик билдиргани хабар қилинган.
Эслатиб ўтамиз, 25 февралда Ўзбекистоннинг Ҳиндистондаги фавқулодда ва мухтор элчиси Фарҳод Арзиев ташқи ишлар вазири биринчи ўринбосари этиб тайинланган, 18 июнда Ўзбекистон ташқи ишлар вазири ўринбосари лавозимида ишлаб келган Дилшод Аҳатов Ўзбекистоннинг Ҳиндистондаги фавқулодда ва мухтор элчиси лавозимини эгаллаганди.
Изоҳ (0)