Zarafshon shahar hokimi o‘rinbosari ikki fuqaroga ishdan bo‘shatish nafaqasi to‘lanmagani ortidan ma’muriy jarimaga tortildi. Bu haqda “Xabar.uz” xabar berdi.
Ma’lum qilinishicha, Zarafshon shahrida 18 yil davomida ishlab kelgan Nasiba Halilova lavozimi qisqartirilgani sababli ishdan ketgan. Ayolning 5 nafar farzandi bor, qo‘shimcha daromadi yo‘q. Ishdan ketganidan keyin, tashkilotdan qonuniy tarzda beriladigan pullarga bir-ikki oy ro‘zg‘orini tebratib turishni rejalashtirgan. Lekin vaziyat bunday bo‘lmagan. Ayol ishdan bo‘shash haqida ariza yozganidan so‘ng ham uning ishxonasi hech qanday qo‘shimcha pul to‘lab bermagan. Uning mehnat daftarchasi esa 2 haftadan keyin berilgan.
Nashrning yozishicha, ana shunday holat yana bir fuqaro Salima Hamroyeva bilan ham yuz bergan. Fuqarolarning Zarafshon shahar adliya bo‘limiga murojaatidan so‘ng vaziyatga oydinlik kiritilgan.
Ma’lum bo‘lishicha, mazkur fuqarolar bilan tuzilgan mehnat shartnomasi 2020-yilning 20-aprelida 12-sonli buyruq asosida bekor qilingan. Ammo Mehnat kodeksiga asosan xodimga shu kunning o‘zida berilish kerak bo‘lgan buyruq nusxasi va mehnat daftarchasi ularga oradan 2 hafta o‘tgandan so‘ng, ya’ni 2020-yilning 6-may kuni taqdim etilgan. Natijada xodimlarning moddiy yordam bo‘yicha qo‘shimcha kafolat olish huquqlari buzilgan hamda ularga ish beruvchi tomonidan ishdan bo‘shatish nafaqasi ham to‘lab berilmagan.
Fuqarolar shu davrga qadar ham ana shu masala yuzasidan bir qator tashkilotlarga murojaat qilgan. Ovoragarchiliklarga qaramasdan, ayollarning murojaatlari qanoatlantirilmagan. Ammo, adliya bo‘limi aralashuvidan so‘ng, xodimlarga jami 11,2 million so‘m pul mablag‘lari undirib berilgan.
Mazkur masala yechimida sustkashlikka yo‘l qo‘yib, mehnat qonunchiligini buzganligi uchun Zarafshon shahar hokimi o‘rinbosari hamda shahar mahalla va oilani qo‘llab-quvvatlash bo‘limi boshlig‘iga nisbatan ma’muriy jarima qo‘llanilgan.
Mavzuga doir:
Izoh (0)