Қозоғистон президенти Қосим-Жўмарт Тўқаев мамлакатда дори-дармонга талаб ошиб кетгани сабаб аҳолига мурожаат қилди. У ўзининг Twitter’даги саҳифаси орқали фуқароларни саросимага берилмасликка чақирган.
«Ҳуқуқ-тартибот идоралари менинг топшириғимга кўра дори-дармон чайқовчилиги билан шуғулланаётганларни ушлашни бошлади. Фуқароларни дори-дармон билан таъминлаш бўйича иш давом этмоқда. Фуқароларга дори-дармонга талаб ошишига олиб келувчи саросимага берилмаслик илтимоси билан мурожаат қиламан», — деб ёзади Тўқаев.
Таъкидлаш керакки, Қозоғистондаги дорихоналарда дори воситаларининг танқислиги сабабли одамлар ижтимоий тармоқлар орқали бир-бирларидан ёрдам сўрашга тушган. Кўпчилик зарур дорини исталган пулга сотиб олишга тайёрлигини ёзмоқда.
Эслатиб ўтамиз, июль ойининг бошидан Қозоғистонда эпидемиологик вазиятнинг мураккаблашиши ва коронавирус тарқалишининг кўпайишини ҳисобга олган ҳолда карантин чоралари кучайтирилган.
Сўнгги маълумотларга кўра, Қозоғистонда коронавирусга чалинганлар сони 26 010 кишига етган. Ҳозирга қадар 16 928 киши соғайган, 264 киши вирус қурбонига айланган. Шунингдек, 25 049 киши коронавирусни белгисиз ташувчи сифатида қайд этилган.
Изоҳ (0)