Nissan собиқ раҳбари Карлос Гон ўзининг Ливанга қочишини ташкиллаштирган шахсга қарийб 1 млн доллар тўлагани маълум бўлди

Nissan компаниясининг собиқ раҳбари Карлос Гон Япониядан Ливанга қочиб кетиши учун 862 минг доллар тўлагани маълум бўлди, деб хабар беради Reuters.

АҚШ прокуратурасининг маълум қилишича, мусиқий анжомлар қутисига яшириниб мамлакатдан чиқиб кетган Карлос Гон қочишидан олдин америкалик Питер Тэйлорнинг компаниясига (қочишни ташкиллаштирган гумонланувчилардан бири) 862 минг доллар ўтказиб берган.

Айблов томонининг қайд этишича, ушбу маблағ 2019 йилнинг сентябрида — қочиш амалга оширилишидан 3 ой олдин ўтказилган.

Карлос Гон 2018 йилнинг ноябрида Японияда ҳибсга олинган эди. У 80 миллион долларни яширганликда, шунингек, Nissan’га 16 миллион доллар зарар келтирганликда айбланган. Nissan уни директорлар кенгаши раислигидан озод қилган.

2019 йилнинг мартида Гон гаров эвазига қўйиб юборилган, бироқ хорижга чиқиб кетмаслиги учун паспорти олиб қўйилган. Гоннинг ўзи барча айбловларни рад этган. Карлос Гон Франция, Бразилия ва Ливан фуқароси ҳисобланади. Гон 2019 йилнинг декабрь охирларида Туркиядаги MNG Jet авиакомпанияси орқали мамлакатдан қочиб кетган эди. Кейинроқ Карлос Гонга ёрдам берган Туркия авиакомпанияси ходими оиласига зарар етказиш билан таҳдид қилинганини маълум қилган.