Qozog‘iston prezidenti Qosim-Jo‘mart To‘qayev mamlakatda dori-darmonga talab oshib ketgani sabab aholiga murojaat qildi. U o‘zining Twitter’dagi sahifasi orqali fuqarolarni sarosimaga berilmaslikka chaqirgan.
“Huquq-tartibot idoralari mening topshirig‘imga ko‘ra dori-darmon chayqovchiligi bilan shug‘ullanayotganlarni ushlashni boshladi. Fuqarolarni dori-darmon bilan ta’minlash bo‘yicha ish davom etmoqda. Fuqarolarga dori-darmonga talab oshishiga olib keluvchi sarosimaga berilmaslik iltimosi bilan murojaat qilaman”, — deb yozadi To‘qayev.
Ta’kidlash kerakki, Qozog‘istondagi dorixonalarda dori vositalarining tanqisligi sababli odamlar ijtimoiy tarmoqlar orqali bir-birlaridan yordam so‘rashga tushgan. Ko‘pchilik zarur dorini istalgan pulga sotib olishga tayyorligini yozmoqda.
Eslatib o‘tamiz, iyul oyining boshidan Qozog‘istonda epidemiologik vaziyatning murakkablashishi va koronavirus tarqalishining ko‘payishini hisobga olgan holda karantin choralari kuchaytirilgan.
So‘nggi ma’lumotlarga ko‘ra, Qozog‘istonda koronavirusga chalinganlar soni 26 010 kishiga yetgan. Hozirga qadar 16 928 kishi sog‘aygan, 264 kishi virus qurboniga aylangan. Shuningdek, 25 049 kishi koronavirusni belgisiz tashuvchi sifatida qayd etilgan.
Izoh (0)