Қозоғистон президенти Қосим-Жўмарт Тўқаев коронавирус инфекцияси асоратлари оқибатида вафот этган фуқаролар шарафига мотам куни белгиланишини эълон қилди, деб хабар бермоқда Kazakhstan Today.
«Эпидемия жамиятда ўз ўрнига эга инсонларни ҳаётдан олиб кетди. Яқинларини йўқотган ҳар бир фуқарога ҳамдардлик билдираман. 13 июлни миллий мотам куни деб эълон қиламан», — деган Тўқаев телевидение орқали қилган мурожаатида.
У фуқароларни сабрли, хотиржам бўлишга, халқ бошига тушган ушбу синовларга бардош беришга чақирган.
«Коронавирусга қарши курашни давом эттиряпмиз. Ғалаба биз томонда бўлишига шубҳа йўқ. Таслим бўлмаслигимиз, тушкунликка тушмаслигимиз керак. Бугун халқнинг бирлашадиган вақти келди. Ҳеч кимни ёлғиз қолдирмаймиз, ҳар бир қозоғистонликнинг ҳаёти учун курашамиз», — деган Қосим-Жўмарт Тўқаев.
Қозоғистонда коронавирус инфекциясига чалинганлар сони 51 059 нафарга етган, эпидемия бошланганидан бери жами 264 нафар бемор COVID-19 асоратлари оқибатида ҳаётдан кўз юмган. 8 июль Тошкент вақти билан соат 21:50 ҳолатига кўра, 3 июндан 8 июлга қадар 17 221 нафар беморнинг коронавирусдан тузалгани хабар қилинган.
Изоҳ (0)