Асакада ҳамширалик иши йўналишида ўқиганлиги ҳақида диплом олиб беришни ваъда қилган коллеж ҳисобчиси 1100 доллар пора билан қўлга тушди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, тумани тиббиёт коллежи бош ҳисобчиси Б.Х. фуқаро З.нинг ишончига кириб, унга юқори лавозимда ишловчи танишлари орқали ҳамширалик иши йўналишида ўқиганлиги ҳақида диплом олиб беришни ваъда қилган.
Эвазига олдиндан талаб қилган 1100 долларини олган вақтида Бош прокуратура ҳузуридаги департаментнинг Асака тумани бўлими томонидан ДХХ ходимлари билан ҳамкорликда ўтказилган тезкор тадбирда ашёвий далил билан ушланган.
Мазкур ҳолат юзасидан Б.Х.га нисбатан Жиноят кодексининг 168-моддаси (Фирибгарлик) 3-қисми ва 28, 211-моддаси (Пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқандда ўқишга киритишни ваъда қилган институт ўқитувчиси 2 минг доллар пора билан ушлангани, Пискентда педагогика университетига ўқишга киритиш учун 3,5 минг доллар олган ўқитувчи қўлга тушгани, Тошкентда баҳоларини қўйдириб бериш эвазига 150 доллар пора талаб қилган коллеж ўқитувчиси ушлангани хабар берилган эди.
Изоҳ (0)