Халқаро меҳнат ташкилоти (ХМТ)нинг Глобал саммити давомида Европа ва Ўрта Осиёда коронавирус пандемиясининг меҳнат бозорларига таъсирига қарши курашиш йўллари ва келажакдаги истиқболларини муҳокама қилиш мақсадида 1 июль, чоршанба куни минтақавий сессиялардан бири бўлиб ўтди. Бу ҳақда «Дарё»га Меҳнат вазирлиги хабар берди.
Марказий Осиё минтақасидан Ўзбекистон бандлик ва меҳнат муносабатлари вазири Нозим Ҳусанов иштирок этди. У иштирокчиларни мамлакат меҳнат бозори учун пандемия оқибатларини бартараф этишнинг маҳаллий тажрибалари билан таништирди.
Ўз нутқида Нозим Ҳусанов иш жойларида ишчиларни ҳимоя қилиш бўйича кўрилаётган чоралар ҳақида тўхталиб ўтди.
Биринчи навбатда, Давлат меҳнат инспекцияси эпидемиология хизмати билан биргаликда корхоналарда санитария меъёрлари ва меҳнат хавфсизлигини таъминлаш тизими мониторингини йўлга қўйди.
Бугунги кунга қадар меҳнат инспекторларининг мониторинг гуруҳлари 5757 корхонада бўлиб, уларнинг 892 тасида хавфсизлик ва меҳнат гигиенаси меъёрларининг бузилиши аниқланди. Ҳар бир вазиятни алоҳида ўрганиш учун инспекторларга тавсия берилди.
Пандемия пайтида ноқонуний ишдан бўшатиш масалалари кун тартибида пайдо бўлди, иш ҳақини, ҳомиладорлик ҳамда туғруқ нафақасини тўлашдан бош тортиш ҳоллари кўпайди.
Мавзуга доир: Тошкентда коронавирусга қарши курашга жалб этилган тиббиёт ходимлари уларга қўшимча тўловлар тўланмаётганини маълум қилди
Текширувлар натижаларига кўра, 3,6 минг фуқаронинг, шу жумладан, 1,2 минг аёлнинг меҳнат ҳуқуқлари тикланди.
Кўпгина корхона ва ташкилотлар карантин-чеклов чоралари шароитида ўз фаолиятларини масофавий ишлаш режимига мослаштирди. Бундай иш режимига ўтиш ва барча меъёрларга риоя қилишни таъминлаш мақсадида Меҳнат вазирлиги «Ходимларни масофавий иш усулига ўтказишнинг вақтинчалик тартиби тўғрисида»ги низомни ишлаб чиқди ва жорий этди.
Аввалроқ Меҳнат вазирлиги Ўзбекистонда қанча одам доимий даромад билан таъминлангани ҳақида хабар берганди.
Изоҳ (0)