Смартфон компьютер клавиатураси каби бактериялар яшайдиган асосий жойлардан бири ҳисобланади. Коронавирус пандемияси сабаб кўпчилик шахсий гигиенага эътибор қарата бошлади, шу сабабли Samsung компанияси янги ITFIT UV Sterilizer номли симсиз қувватлантиргични тақдим этди. Янги қурилма гаджетни ультрабинафша нурлар ёрдамида тозалай олади, деб хабар қилади Hi-Tech.Mail.ru.
Қурилма ташқи кўриниши жиҳатидан оддий оқ қутига ўхшайди. Фойдаланувчи ўзининг смартфонини (унинг ичига ҳатто 6,9 дюймли Galaxy S20 Ultra ҳам сиғади) қурилма ичига солади. Мазкур янгилик орқали нафақат смартфонни, балки бошқа симсиз гаджетларни ҳам қувватлантириш мумкин: соат ёки наушниклар. Қурилма 10 Ватт қувватни тақдим этишга қодир.
ITFIT UV Sterilizer батарея қувватини тўлдиришдан ташқари, қурилмани дезинфекция қилишга ҳам қодир. Ишлаб чиқарувчининг таъкидлашича, қути ичига жойлаштирилган қурилмадаги 99 фоиз зарарли микроорганизмлар 10 дақиқада йўқ қилинади.
Ҳозирча ITFIT UV Sterilizer фақатгина битта бозорда — Таиландда сотилмоқда. Қурилманинг нархи 51 доллар. Қувватлантиргич қачондан бошлаб бошқа давлатларда сотувга чиқишига аниқлик киритилмаган.
Аввалроқ Массачусетс технология институти тадқиқотчилари ҳар қандай бино ичини автоматик режимда дезинфекция қилувчи ультрабинафша лампаларга эга роботни яратгани тўғрисида хабар берилганди. Мазкур робот 380 метр квадратга эга бинони тозалаш учун 30 дақиқа вақт сарфлайди.
Изоҳ (0)