Баҳрайнда коронавирусни йўқ қила оладиган робот яратилди

Баҳрайнда микроорганизмлар, хусусан, коронавирусни йўқ қила оладиган робот ишлаб чиқилди, деб хабар беради Daily Mail.

Робот 12 тилда гаплашади, овозли буйруқларни бажаради, юзни таниш технологиясига эга, тана ҳароратини ўлчай олади.

У вирусларга қисқа тўлқинли ултрабинафша нур билан таъсир ўтказади. Ярим соатда микроорганизмларни 90 фоизгача ўлдира олади. Ултрабинафша нур микроорганизмларнинг мембранасини ёриб кириши натижасида уларда ДНК парчаланиши юз беради.

Шарқий Англия университети профессори Пол Хантернинг фикрича, ултрабинафша нурларнинг вирусларга қарши таъсири — янгилик эмас. Ундан кўплаб соҳаларда фойдаланилади, масалан, ичимлик сувини зарарсизлантиришда.

Айни вақтда олимлар роботни саноат шароитида синовдан ўтказмоқда. Таъкидлашича, ҳозирда роботнинг иккита нусхаси ишлаб чиқарилган ва Баҳрайн тиббиёт муассасаларида ишламоқда.

Аввалроқ Ford полициячилар автомобилида коронавирусни ўлдирадиган тизимни ишга туширгани тўғрисида хабар берилганди.