Apple iPhone ҳамда iPad’га мўлжалланган энг яхши ўйин ва мобил иловаларни эълон қилди

Ҳар йили топшириладиган Design Awards мукофоти доирасида Apple компанияси iPhone ҳамда iPad’лар учун мўлжалланган энг яхши иловаларни танлайди. Бунда улар дастурчиларнинг қурилма ва дизайн интерфейсига қулайлик яратиш мақсадида ёки шунчаки чиройли маҳсулот ўйлаб топганлигини инобатга олади, деб хабар беради «Hi-Tech.Mail.ru».

2020 йилда мукофот лауреатлари рўйхатидан тўртта дастур ва тўртта ўйин ўрин олди.

Darkroom — фото ва видеоларни таҳрирлашга мўлжалланган дастур интерфейсининг яхшилиги ҳамда барча функциялардан фойдаланиш қулайлиги учун танланди.

Looom — анимация яратишга мўлжалланган дастурга мусиқий таҳрирлагич бошқарувидаги элементлар киритилган. Унинг ёрдамида ҳаваскор ва профессионал даражада графикаларни яратиш мумкин.

Shapr3D — CAD-чизмалар билан ишлашга мўлжалланган кучли дастур бўлиб, Apple Pencil қалами ва ARKit қўшимча реаллигининг барча функциялари ишлайди. Нолдан бошлаб катта ҳажмли объект ва бинолар чизмасини яратиш мумкин.

StaffPad — композиторлар учун ноёб дастур, унинг ёрдамида қўлёзма ноталарини рақамли форматга ўтказиш ва тўлақонли мусиқани яратиш мумкин.

Sayonara Wild Hearts — ноодатий графикаси ва мусиқаси билан ажралиб турувчи «раннер» жанридаги динамик ўйин. Уни Apple Arcade’га обуна бўлиб ўйнаш мумкин.

Sky: Children of the Light — Journey ижодкорлари томонидан тақдим этилган сеҳрли олам ҳақида бепул ўйин. Ушбу оламни якка ҳолда ёки бошқа ўйинчилар билан интернет орқали тиклаш мумкин.

Song of Bloom — бошқотирмаларга ноодатий ёндашувчи ва мунтазам ўзгарувчи визуал услубга эга ўйин.

Where Card Fall — бутун дунё қартадан ясаладиган бошқотирма ўйин.