Қозоғистонда коронавирус эпидемияси даврида 18 нафар тиббиёт ходими касалликдан вафот этгани маълум қилинди

Коронавирус пандемияси даврида Қозоғистонда жами 18 нафар тиббиёт ходими COVID-19 асоратлари оқибатида ҳаётдан кўз юмган. Бу ҳақда давлат бош санитар врачи Айжан Есмагамбетовага таяниб Tengrinews нашри хабар қилган.

«Бугунги кунда Қозоғистонда коронавирусга чалинганларнинг 11,5 фоизини тиббиёт ходимлари ташкил қилади. Уларнинг 492 нафарида пневмония кузатилмоқда. 511 нафар тиббиёт ходими даволанишни давом эттирмоқда. Улар орасидан 18 нафари касаллик асоратлари оқибатида вафот этган», — деган Айжан Есмагамбетова махсус брифингда.

Шунингдек, Есмагамбетова ўлим ҳолатларининг ҳаммаси ҳам коронавирус билан боғлиқ эмаслигини қайд этган. Шифокорнинг айтишича, бунда COVID-19 беморларини даволаш билан бевосита алоқадор фаолиятнинг таъсири мавжуд.

2020 йил 7 апрелда Қозоғистонда тиббиёт ходимларининг 120 нафари коронавирус юқтириб олгани хабар қилинган.

14 июнда Қозоғистон соғлиқни сақлаш вазири Елжан Биртановда коронавирус аниқланди, кейинчалик 20 июнда Елжан Биртанов лавозимидан озод қилиниб, унинг ўрнини ўринбосари Алексей Цой эгаллади.

Қозоғистоннинг биринчи президенти Нурсултон Назарбоев ҳам 18 июнда коронавирус билан касаллангани маълум қилинди. У касаллик туфайли Москвада ўтган Ғалаба парадида иштирок этмади. 2 июлда Назарбоевнинг коронавирусдан тузалгани, ўзини изоляция қилишда давом этиши, масофадан ишлаши ва очиқ ҳавода сайр қилиш учун вақт ажратиши айтилди.