АҚШда бир суткада 55 мингдан ортиқ кишида коронавирус аниқланди. Бу эпидемия бошланганидан буён дунё бўйича рекорд кўрсаткич

АҚШда сўнгги суткада 55 274 кишида коронавирус қайд этилди, деб хабар бермоқда Reuters. Бу эпидемия бошланганидан буён дунё бўйлаб кунлик касалланишлар бўйича рекорд кўрсаткичдир.

Қайд этилишича, сўнгги 2 ҳафтада АҚШнинг 50 штатидан 37 тасида касалланишлар сони ортиб бормоқда.

Кунлик касалланишлар сони бўйича аввалги рекорд 19 июнь куни Бразилияда қайд этилган бўлиб, 54 771 киши коронавирусга чалинганди.

АҚШда касалланишлар сони июнь ойининг иккинчи ярмидан ортишни бошлади. Унгача мамлакатда бир неча ҳафта давомида COVID-19’га чалинганлар сони 20 минг киши атрофида бўлиб турганди.

Айни пайтда АҚШ коронавирусга чалинганлар сони бўйича дунёда етакчи бўлиб турибди. Эпидемия бошланганидан буён аҳолисининг сони 329 миллион кишидан иборат мамлакатда 2,8 миллион киши коронавирусга чалинган, уларнинг 130 мингдан ортиғи вирус қурбони бўлган.

Аввалроқ АҚШ бош инфекционисти мамлакатда коронавирусга чалинганлар сони кунига 100 минг кишига етиши мумкинлигидан огоҳлантиргани хабар берилган эди.