Ўзбекистонда айрим қонун ҳужжатларига ўзгартириш ва қўшимчалар киритиш тўғрисидаги навбатдаги қонун лойиҳаси жамоатчилик муҳокамасига қўйилди. Монополияга қарши курашиш қўмитаси муҳокамага қўйган лойиҳада, хусусан, «Истеъмол кредити тўғрисида»ги қонуннинг 15-моддасига ўзгартиришлар киритиш кўзда тутилган.
Ҳозир истеъмол кредитлари фақат Ўзбекистонда ишлаб чиқарилган товарлар (хизматлар) учун берилади, ҳужжат лойиҳасида эса чет эл маҳсулотларини харид қилишда ҳам истеъмол кредитларини бериш таклиф этилмоқда.
Қўмита банкларга молиявий истеъмол кредитларини нақд пул ва хорижий валютада бериш таклифини берган. Эслатиб ўтамиз, ҳозир Ўзбекистондаги банкларда кредитларни нақд пул шаклида бериш тақиқланган.
Шунингдек, истеъмолчиларга ишлаб чиқарувчи ёки товарларни (хизматларни) тақдим қилувчи ташкилотга кредит олингани тўғрисида электрон шаклда (ҳозирда фақат ёзма равишда) хабар бериш имконияти берилиши режалаштирилган.
Ҳужжатнинг regulation.gov.uz порталидаги муҳокамаси 2020 йил 16 июлгача давом этади.
2020 йил 23 майда қабул қилинган ҳукумат қарорига мувофиқ халқаро молия институтлари ва хорижий ҳукумат молия ташкилотлари иштирокидаги лойиҳаларни амалга оширишга мўлжалланган, Ўзбекистонда ишлаб чиқарилмайдиган махсус техника ва технологик ускуналар божхона божлари ҳамда солиқлар тўлашдан шартли озод этилган.
Изоҳ (0)