O‘zbekistonda ayrim qonun hujjatlariga o‘zgartirish va qo‘shimchalar kiritish to‘g‘risidagi navbatdagi qonun loyihasi jamoatchilik muhokamasiga qo‘yildi. Monopoliyaga qarshi kurashish qo‘mitasi muhokamaga qo‘ygan loyihada, xususan, “Iste’mol krediti to‘g‘risida”gi qonunning 15-moddasiga o‘zgartirishlar kiritish ko‘zda tutilgan.
Hozir iste’mol kreditlari faqat O‘zbekistonda ishlab chiqarilgan tovarlar (xizmatlar) uchun beriladi, hujjat loyihasida esa chet el mahsulotlarini xarid qilishda ham iste’mol kreditlarini berish taklif etilmoqda.
Qo‘mita banklarga moliyaviy iste’mol kreditlarini naqd pul va xorijiy valyutada berish taklifini bergan. Eslatib o‘tamiz, hozir O‘zbekistondagi banklarda kreditlarni naqd pul shaklida berish taqiqlangan.
Shuningdek, iste’molchilarga ishlab chiqaruvchi yoki tovarlarni (xizmatlarni) taqdim qiluvchi tashkilotga kredit olingani to‘g‘risida elektron shaklda (hozirda faqat yozma ravishda) xabar berish imkoniyati berilishi rejalashtirilgan.
Hujjatning regulation.gov.uz portalidagi muhokamasi 2020-yil 16-iyulgacha davom etadi.
2020-yil 23-mayda qabul qilingan hukumat qaroriga muvofiq xalqaro moliya institutlari va xorijiy hukumat moliya tashkilotlari ishtirokidagi loyihalarni amalga oshirishga mo‘ljallangan, O‘zbekistonda ishlab chiqarilmaydigan maxsus texnika va texnologik uskunalar bojxona bojlari hamda soliqlar to‘lashdan shartli ozod etilgan.
Izoh (0)