Олтин ва бошқа қимматбаҳо металлардан тайёрланган ёмбиларни Марказий банк шохобчаларидан сотиб олиш мумкин бўлди

Вазирлар Маҳкамасининг «Ўзбекистон Республикасида ишлаб чиқарилган ва қимматбаҳо металлардан тайёрланган ўлчовли ёмбиларни сотиш ва қайтариб сотиб олиш тартиби тўғрисидаги низомни тасдиқлаш ҳақида»ги 412-сонли қарори қабул қилинди. Бу ҳақда Norma хабар қилди.

Ҳужжат Президент томонидан 2018 йил 7 июнда имзоланган «Ўзбекистон Республикасида қимматли металлардан ўлчовли ёмбилар ишлаб чиқаришни ташкил этиш ҳамда қимматли металлар бозори фаолиятини регламентга солиш чора-тадбирлари тўғрисида»ги ПҚ-3778-сонли қарорни амалга ошириш доирасида ишлаб чиқилган.

Қайд этилишича, низом Ўзбекистонда ишлаб чиқарилган, қимматбаҳо металлардан тайёрланган, Марказий банк томонидан муомалага чиқарилган ўлчовли ёмбиларни МБнинг ҳудудий бош бошқармалари ва тижорат банклари орқали (кейинги ўринларда — шохобча) сотиш ва қайтариб сотиб олиш тартибини белгилайди.

Ёмбилар нархлари халқаро қимматбаҳо металлар бозори конъюнктураси, сўмнинг АҚШ долларига нисбатан курси, шунингдек, Марказий банкнинг маржа ва чегирмасидан келиб чиққан ҳолда ҳар куни Марказий банк бошқаруви томонидан белгиланади. Бунда МБ фойда олиш мақсадини кўзламайди.

Ҳар бир ёмби сертификати идентификация серия рақамига эга бўлади ва ушбу рақам ёмбининг юза қисмида кўрсатилади.

Қадоғи бузилмаган ва сертификатга эга ёмбини қайтариб сотиш учун ёмби эгаси шохобчага мурожаат қилади. Шу куннинг ўзида банк қайтариб сотиб олинган ёмби бўйича унинг эгаси билан ҳисоб-китобни амалга оширади.

Қадоғи бузилган ёки қадоқсиз ёмбилар алмаштирилиши мумкин. 20 иш куни мобайнида топширилган ёмби Давлат асиллик даражасини белгилаш палатасида техник экспертизадан ўтказилади, шундан кейин ёмби эгасига берилади.

Экспертиза натижасида қалбакилаштириш аломатлари аниқланган ҳолларда ёмбилар Давлат асиллик даражасини белгилаш палатаси томонидан ҳуқуқни муҳофаза қилувчи органларга топширилади. Ушбу ёмбилар эгаларига қайтариб берилмайди ва қайтариб сотиб олинмайди.

Ҳужжат Қонун ҳужжатлари маълумотлари миллий базасида эълон қилинган ва 2020 йил 30 июндан кучга кирди.