Vazirlar Mahkamasining “O‘zbekiston Respublikasida ishlab chiqarilgan va qimmatbaho metallardan tayyorlangan o‘lchovli yombilarni sotish va qaytarib sotib olish tartibi to‘g‘risidagi nizomni tasdiqlash haqida”gi 412-sonli qarori qabul qilindi. Bu haqda Norma xabar qildi.
Hujjat Prezident tomonidan 2018-yil 7-iyunda imzolangan “O‘zbekiston Respublikasida qimmatli metallardan o‘lchovli yombilar ishlab chiqarishni tashkil etish hamda qimmatli metallar bozori faoliyatini reglamentga solish chora-tadbirlari to‘g‘risida”gi PQ-3778-sonli qarorni amalga oshirish doirasida ishlab chiqilgan.
Qayd etilishicha, nizom O‘zbekistonda ishlab chiqarilgan, qimmatbaho metallardan tayyorlangan, Markaziy bank tomonidan muomalaga chiqarilgan o‘lchovli yombilarni MBning hududiy bosh boshqarmalari va tijorat banklari orqali (keyingi o‘rinlarda — shoxobcha) sotish va qaytarib sotib olish tartibini belgilaydi.
Yombilar narxlari xalqaro qimmatbaho metallar bozori konyunkturasi, so‘mning AQSh dollariga nisbatan kursi, shuningdek, Markaziy bankning marja va chegirmasidan kelib chiqqan holda har kuni Markaziy bank boshqaruvi tomonidan belgilanadi. Bunda MB foyda olish maqsadini ko‘zlamaydi.
Mavzuga doir: O‘zbekiston oltin zaxiralari bo‘yicha Saudiya Arabistonini ortda qoldirib dunyoda 17-o‘ringa chiqdi
Har bir yombi sertifikati identifikatsiya seriya raqamiga ega bo‘ladi va ushbu raqam yombining yuza qismida ko‘rsatiladi.
Qadog‘i buzilmagan va sertifikatga ega yombini qaytarib sotish uchun yombi egasi shoxobchaga murojaat qiladi. Shu kunning o‘zida bank qaytarib sotib olingan yombi bo‘yicha uning egasi bilan hisob-kitobni amalga oshiradi.
Qadog‘i buzilgan yoki qadoqsiz yombilar almashtirilishi mumkin. 20 ish kuni mobaynida topshirilgan yombi Davlat asillik darajasini belgilash palatasida texnik ekspertizadan o‘tkaziladi, shundan keyin yombi egasiga beriladi.
Ekspertiza natijasida qalbakilashtirish alomatlari aniqlangan hollarda yombilar Davlat asillik darajasini belgilash palatasi tomonidan huquqni muhofaza qiluvchi organlarga topshiriladi. Ushbu yombilar egalariga qaytarib berilmaydi va qaytarib sotib olinmaydi.
Hujjat Qonun hujjatlari ma’lumotlari milliy bazasida e’lon qilingan va 2020-yil 30-iyundan kuchga kirdi.
Izoh (0)