Наманган вилояти йўлларига шовқин чиқарувчи чизиқларни чизиш бошланди. Бу ҳақда ИИВ ЙҲХББ ахборот хизмати хабар берди.
Маълумотларга кўра, шовқин чиқарувчи бу каби чизиқлар термопластдан тайёрланган бўлиб, у ҳайдовчининг ҳушёрлигини оширишга хизмат қилади.
«Бугунги кунда чарчоқ ҳолатида транспорт воситасини бошқариб, ўзи ва ўзгалар ҳаётини хавф остига қўйиб ҳаракатланаётган ҳайдовчилар кўплаб учрамоқда. Ушбу ҳайдовчилар томонидан турли кўринишдаги йўл-транспорт ҳодисалари ҳам содир бўлаётганлиги ҳеч кимга сир эмас», — дейилади хабарда.
Таъкидланишича, йўлда ҳаракатланиб келаётган ҳайдовчилар ушбу чизиқлар устидан ҳаракатланиб ўтган вақтида шовқин юзага келади ва чарчаган ҳайдовчи шовқинни эшитиб етарлича сергакланади.
Бу чизиқлар фақатгина йўл-транспорт ҳодисалари олдини олиш мақсадида чизилган бўлиб, синов тариқасида қўлланилмоқда. Аввалроқ худди шу турдаги йўл чизиқлари Тошкент вилояти ҳудудларида ҳам чизилган.
Эслатиб ўтамиз, 2018 йилда Қашқадарёнинг Косон туманида Ўзбекистондаги илк овозли пиёдалар йўлакчаси қурилган эди.
Маълумот учун, 2019 йилда мамлакат бўйича жами 8588 та йўл-транспорт ҳодисаси содир этилган бўлиб, уларда 7943 нафар фуқаро жароҳатланган ва 2096 нафар шахс ҳалок бўлган.
Изоҳ (0)