Швеция ҳукумати мамлакатда COVID-19 эпидемиясига қарши амалга оширилган чора-тадбирларни тафтиш қилиш бўйича комиссия тузди. Бу ҳақда Financial Times нашри мамлакат бош вазири Стефан Лёвенга ассосланиб хабар қилган.
Комиссия коронавирусга қарши марказий ва маҳаллий ҳукумат томонидан кўрилган чоралар ва шведларнинг чекловларга қай даражада амал қилганини ўрганади. Бундан ташқари, комиссия Швециянинг эпидемияга қарши бошқа мамлакатларга нисбатан қанчалик даражада кураша олганига ҳам баҳо беради.
Комиссия таркибига тиббиёт, ахлоқшунослик ва иқтисодиёт соҳаси мутахассислари киритилади. Комиссияни Швеция олий маъмурий судининг собиқ раҳбари бошқаради. Комиссия ўз фаолияти бўйича якуний ҳисоботни 2022 йил февраль ойида тақдим қилади, деб ёзмоқда Bloomberg.
Financial Times’нинг қайд этишича комиссия Стефан Лёвеннинг эпидемияга қарши кураш бўйича ёндашувини кескин танқид қилган мухолифат вакиллари босими остида тузилган.
Швеция Европадаги бошқа давлатлардан фарқли равишда COVID-19’га қарши курашда кескин карантин чораларини қўлламади. Мамлакатда оммавий тадбирлар тўхтатилиб, кинотеатр ва музейлар ёпилди, бошланғич мактаблар, кафе, сартарошхона ва савдо марказларининг фаолияти давом этган.
Мазкур стратегия туфайли мамлакатда касалланиш ва ўлим ҳолатлари Шимолий Европанинг бошқа давлатларига нисбатан кескин ошган. Швецияда 69 минг нафар одам коронавирус билан касалланган, 5370 киши вафот этган. Уларнинг аксар қисми 70 ёшдан катта инсонлар.
Июнь бошида Швеция бош эпидемиологи Андерс Тегнелл мамлакатда COVID-19’га қарши кураш чораларини кучайтириш, хусусан, қариялар уйидаги санитар-эпидемиологик вазиятни яхшилаш лозимлигини қайд этган ва амалдаги стратегия сабаб ўлимлар сони кўплигини тан олган. Тегнелл шунга қарамай танланган йўлни тўғри деб ҳисобламоқда.
Аввал Янги Зеландия ҳукуматининг илмий маслаҳатчиси, профессор Майкл Бейкер Швециянинг коронавирус эпидемиясига қарши курашда 3 та хатога йўл қўйганини қайд этган. Ундан аввал Италиянинг Падуа университети молекуляр тиббиёт кафедраси профессори, вирусолог Андреа Крисанти Швеция ва Беларуснинг коронавирус бўйича стратегиясини оқилона бўлмаган қарор деб атаган эди.
Изоҳ (0)