2020 йилнинг 5 ойи давомида хизмат вазифасини бажариш пайтида 5 нафар ички ишлар ходими вафот этган, 73 нафар ходим тан жароҳати олган. Бу ҳақда Халқаро пресс-клубнинг 1 июль куни бўлиб ўтган сессиясида Ички ишлар вазири матбуот котиби Шоҳрух Ғиёсов маълум қилди.
Йўл ҳаракати хавфсизлиги хизматида фаолият юритган 4 нафар ходим вафот этгани, шунингдек, 31 нафари оғир тан жароҳати олгани айтиб ўтилди.
Ғиёсов мисол тариқасида Наманган ва Хоразм вилоятларидаги воқеаларни келтирган. Жумладан, 2 март куни Наманганнинг Поп туманида қидирувдаги шахс ўзини ўлдириш билан қўрқитмоқчи бўлиб, қўлбола тўппончани бошига тираган чоғида бундан қайтармоқчи бўлган жиноят қидирув бўлими тезкор вакилига икки марта ўқ узиб жароҳатлаган.
Май ойида эса Хоразм вилоятида гиёҳванд моддалар савдоси билан шуғулланувчи шахс ушланганда, унинг укаси, уйидан милтиқ олиб чиқиб ички ишлар ходимига ўқ узган. Натижада ходим оғир жароҳат олган.
Эслатиб ўтамиз, 2020 йилнинг апрель ойида Марғилон шаҳридаги деҳқон бозори ҳудудида ИИБ пост-патруль хизмати ва жамоат тартибини сақлаш бошқармаси ходими калтакланган эди.
Мавзуга доир:
- Шавкат Мирзиёев Чироқчи ва Андижонда ИИБ ходимларининг фуқароларни калтаклаши билан боғлиқ воқеалар учун соҳа раҳбарларини танқид қилди
- Андижонлик фуқаронинг ИИБ ходимлари томонидан калтаклангани ортидан Омбудсман ва Акмал Саидов ўртасида баҳс юзага келди
- Тошкентда хизмат вақтида қаршиликка учраган милиционер ўқ узишга мажбур бўлди
Изоҳ (0)