Ўзбекистон Республикаси ташқи ишлар вазири Абдулазиз Камилов 1 июль, чоршанба куни Украинанинг фавқулодда ва мухтор элчиси этиб тайинланган Николай Дорошенкони қабул қилди. Бу ҳақда Ташқи ишлар вазирлиги ахборот хизмати хабар берган.
Вазир ишонч ёрлиқлари нусхаларини қабул қилар экан, элчини ушбу лавозимга тайинлангани билан табриклади ва унга Ўзбекистон ҳамда Украина ўртасидаги ўзаро манфаатли ҳамкорликни мустаҳкамлашдаги фаолиятига муваффақият тилади.
Учрашувда турли соҳалардаги Ўзбекистон—Украина ҳамкорлигининг долзарб масалалари муҳокама қилинди. Савдо-иқтисодий, маданий-гуманитар, туризм, таълим, тиббиёт ва бошқа соҳалардаги муносабатларни ривожлантиришга алоҳида урғу берилди.
Учрашувда қўшма тадбирлар, жумладан, ҳар томонлама ҳамкорлик бўйича Ўзбекистон—Украина Ҳукуматлараро комиссиясининг навбатдаги мажлисини ўтказиш бўйича таклифлар кўриб чиқилган.
Суҳбат чоғида коронавирус пандемияси икки томонлама савдо айланмаси кўрсаткичларига салбий таъсир кўрсатаётгани қайд этилди. Шу нуқтаи назардан, Ўзбекистон ва Украина ишбилармон доиралари, савдо-саноат палаталари ва ҳудудлари ўртасида тўғридан-тўғри алоқаларни ривожлантиришдан икки томон ҳам манфаатдор эканлиги тасдиқланди.
Томонлар қўшма илмий лойиҳаларни амалга оширишга, фан, техника ва инновациялар соҳасидаги ҳамкорликни фаоллаштиришга тайёр эканликларини маълум қилди.
Музокараларда томонларни қизиқтирган бошқа масалалар ҳам муҳокама қилинди, дейилади ТИВ хабарида.
Николай Дорошенко 2020 йил 14 апрелда Украинанинг Ўзбекистондаги янги элчиси лавозимига тайинланган.
Николай Дорошенко Украина Ташқи ишлар вазирлиги тизимида, Украина президенти маъмурияти ҳамда Миллий хавфсизлик ва мудофаа кенгашида ишлаган. У Украинанинг Россиядаги элчихонасида элчи маслаҳатчиси ва махсус топшириқлар бўйича элчи сифатида фаолият юритган. 2015 йилдан 2017 йилгача у Украинанинг Қирғизистондаги элчиси бўлиб ишлаган, сўнгра Украина Ташқи ишлар вазирлигининг марказий аппаратида фаолият олиб борган.
Украинанинг Ўзбекистондаги аввалги элчиси Юрий Савченко саккиз йиллик миссиясини 2019 йилнинг апрель ойида якунлаган. Шундан бери Украина дипломатик ваколатхонасини муваққат ишлар вакили Денис Погребной бошқариб келган.
Изоҳ (0)