Kanada tanga saroyi mamlakat aholisiga og‘ir damlarda kerakli narsalar bilan ta’minlayotgan volontyorlar, oziq-ovqat do‘konlari sotuvchilari, shifokorlar, tibbiyot xodimlari va boshqa xodimlar sharafiga maxsus tanga zarb qildi. Bu haqda Kanada tanga saroyining rasmiy saytida axborot berilgan.

Tanganing bir tomonida Kanada bayrog‘idagi ramz barg va yurak tasvirlangan. Boshqa tomonida esa ulkan yurak atrofida aylana bo‘lib quchoqlashib turgan odamlar tasvirini ko‘rish mumkin. Ularning ostiga ingliz va fransuz tillarida “Tashakkur” so‘zi yozib qo‘yilgan. Bundan tashqari tanga tarkibida magnit mavjud va uni turli joylarga yopishtirib qo‘yish mumkin.

Tanganing narxi 9 Kanada dollari 95 sent turadi (taxminan 7,5 AQSh dollari). Uni faqat onlayn buyurtma orqali xarid qilish mumkin. Sotuvdan tushgan pullarning barchasi koronavirusga qarshi xayriya jamg‘armasi hisobiga o‘tkaziladi.

“Kanada tanga saroyi ushbu loyiha orqali pandemiya davrida odamlarga yordam berayotgan barchaga minnatdorlik bildirishni niyat qilgandi”, – deyiladi saroy rahbari Mari Lemening bayonotida.

Kanadada koronavirus yuqtirib olish bo‘yicha eng birinchi holat 15-yanvarda qayd etilgan, 2020-yil 1-iyul holatiga ko‘ra mamlakatda infeksiya aniqlangan bemorlar soni 104 ming nafardan oshib ketgan, 8,6 ming kishi kasallik asoratlari oqibatida vafot etgan, 67,5 ming nafar bemor COVID-19’dan tuzalgan.

29-iyun kuni Kanada bosh vaziri Jastin Tryudo mamlakatning koronavirusga qarshi kurashda muvaffaqiyatlarga erishayotganini qayd etgan, biroq xavf hali ortda qolmagani va pandemiyaning ikkinchi to‘lqiniga tayyor turish lozimligini ta’kidlagandi. Uning so‘zlariga ko‘ra, statistika kasallanganlar va vafot etganlar sonining kamayib borayotganini ko‘rsatmoqda, davlatning ayrim hududlarida koronavirus infeksiyasiga chalinish holatlari umuman kuzatilmaganini aytib o‘tgan.

Avvalroq Kanada chetdan kelganlar uchun izolyatsiya tartibini 31-avgustgacha uzaytirgani va unga amal qilmaganlar 6 oyga qamalishi mumkinligi xabar qilingan.