Ўзбекистон Президентининг фармойишига асосан Президент администрацияси ижро этувчи аппаратида бир қатор тайинловлар амалга оширилди. Бу ҳақда ЎзА хабар берди.
Фармойишга кўра, Дилноза Зиёмуҳамедова Оммавий ахборот воситалари, телевидение ва матбуотни ривожлантириш шўъбаси мудири лавозимига тайинланди. Шунингдек, Дилноза Зиёмуҳамедовага Президент администрацияси раҳбарининг ўринбосари вазифасини вақтинча бажариш ҳам топширилди.
Мазкур тайинловгача Дилноза Зиёмуҳамедова Ахборот ва оммавий коммуникациялар агентлигининг Оммавий коммуникациялар масалалари бўйича маркази бошлиғи лавозимида ишлаб келган.
Ғуломжон Самадов Президент администрацияси ижро этувчи аппаратининг Тадбирлар ёритилишини тайёрлаш шўъбаси мудири лавозимини эгаллади.
Ғуломжон Самадов шу пайтга қадар Халқаро пресс-клуб бош продюсери сифатида фаолият олиб бораётганди.
Носиржон Жўраев ижро аппаратининг Таҳлилий материалларни тайёрлаш ва администрация бўлинмалари фаолиятини мувофиқлаштириш шўъбаси етакчи консультанти лавозимига тайинланган ва шу муносабат билан Оммавий ахборот воситалари, телевидение ва матбуотни ривожлантириш шўъбаси мудири лавозимидан озод этилган.
Аввалроқ Президент администрацияси раҳбари ўринбосари лавозимида ишлаб келган Фарҳод Маҳмудов Ўзбекистон Миллий телерадиокомпанияси раисининг биринчи ўринбосари этиб тайинлангани ҳақида хабар берилганди.
Шунингдек, Миллий масс-медиани қўллаб-қувватлаш ва ривожлантириш жамоат фонди директори, блогер Хушнудбек Худойбердиев Ўзбекистон Миллий ахборот агентлиги бош директори ўринбосари этиб тайинланди.
Изоҳ (0)