Вазирлар Маҳкамасининг қарорига биноан, Фарҳод Маҳмудов Ўзбекистон Миллий телерадиокомпанияси раисининг биринчи ўринбосари этиб тайинланди. Бу ҳақда ЎзА хабар берди.
Шу пайтга қадар Миллий телерадиокомпанияси раисининг биринчи ўринбосари лавозимида ишлаб келган Хайрулла Нуритдинов бошқа ишга ўтиши муносабати билан ушбу лавозимдан озод қилинди. У 2018 йилнинг август ойидан буён мазкур лавозимни эгаллаб турганди.
Мазкур тайинловга қадар Фарҳод Маҳмудов 2019 йилнинг сентябрь ойидан буён Ўзбекистон Президент администрацияси раҳбари ўринбосари лавозимида ишлаб келаётганди.
Унгача ЎзМТРК «Ўзбекистон 24» телеканали бош муҳаррири лавозимида ишлаган Фарҳод Маҳмудов 2018 йил сентябрида Оммавий ахборот воситалари, маънавият ва маърифат, маданият, санъат ва ижодий ташкилотларни ривожлантириш масалалари хизмати бўйича Президент маслаҳатчисига ўринбосар этиб тайинланган эди.
Фарҳод Маҳмудов 1973 йил Тошкент вилояти Чиноз туманида туғилган. У 1996 йил Тошкент давлат университетини тамомлаган. Маълумоти бўйича мутахассислиги журналист. 2008 йил «Меҳнат шуҳрати» ордени, 2018 йилда «Ўзбекистонда хизмат кўрсатган журналист» фахрий унвони билан тақдирланган.
Фарҳод Маҳмудов 1995 йилдан буён ЎзМТРК тизимида турли лавозимларда фаолият кўрсатган.
Изоҳ (0)