Қарши тумани ҳокими Мақсуда Мустафоева туманнинг ғалла режасини бажариш учун чорвачилик фермер хўжалиги томонидан озуқа мақсадида етиштирилган ғаллани ҳам тортиб олмоқда. Бу ҳақда «Дарё»га шикоят қилган фермер Рустам Бозоровнинг айтишича, ҳоким ушбу мақсадига етишиш учун ИИБ кучидан фойдаланмоқда.
«27 июнь куни эрталаб соат 11-12 да туман ИИБ ходимлари келиб, ғаллани ўраётган комбайнни тўхтатди ва комбайнни жарима майдонига олиб кетмоқчилигини, бу туман ИИБ бошлиғининг буйруғи эканлигини айтди, — дейди фермер Рустам Бозоров. — Ҳоким ғалламни тортиб олаётгани етмагандек, ғаллани ўзимнинг комбайнимда ўришга рухсат бермаяпти. МТПдан комбайн беришар экан. Гектарига 500-600 минг сўм тўлаб, сомонни тўкиб кетадиган комбайнда ғалламни ўриб олишим ва килосини 1500-1800 сўмдан топширишим керак экан. Уларнинг талабини бажарсам, ўзим чорвамга озуқа — шелухани 3000 минг сўмдан сотиб олишга мажбур бўламан».
Фермернинг айтишича, ҳоким бир сотих ерда ҳам ғалла қолмаслигини барчасини топширишни талаб қилган. Фермернинг эътирозига қулоқ солмаган ва ҳатто бу борада гаплашишни ҳам эп кўрмаган.
«Ҳокимга бу ғалла чорва молларимнинг озуқаси учун, деб дардимни айтишга боргандим, эшитишни ҳам хоҳламади», — дейди фермер.
Маълум бўлишича, Рустам Бозоров раҳбарлигидаги фермер хўжалиги «Исмоил Бозоров» МЧЖга қарашли бўлиб, ихтиёрида 845 гектар ер бор. Шунинг 645 гектари суғориладиган ер бўлиб, фермер бу ерга 350 бош наслли қорамолини боқиш учун озуқа экиб фойдаланади.
«Биламан, жорий йил жуда оғир келди. Гектарлаб ғаллани дўл уриб кетди. Аммо ҳоким шуни ётиғи билан тушунтириб, ғалла режасини бажаришда менга кўмак беринг деса, олам гулистон-ку. Керак бўлса, барча ғалламни бераман. Аммо зўравонлик қилиб, фермерларнинг бурнини қонатиш нимага керак?», — дейди ҳокимдан жабр кўраётган фермер.
Фермер даласида «Дарё» мухбири билан суҳбатлашган ИИБ ходими, профилактика инспектори Феруз Бўриев фермер хўжалиги даласига унинг комбайнини жарима майдонига олиб кетиш учун келганини, бу туман ИИБ бошлиғининг топшириғи эканлигини айтди. Аммо комбайннинг жарима майдонига олиб кетилишига сабаб бўлаётган «айби»ни билмаслигини таъкидлади.
«Менга шундай топшириқ беришган. Мен комбайнчи эмасман, комбайннинг айбини билмайман. Мен берилган топшириқни бажараман. Туманнинг ғалла режаси тўлмагунча шахсий комбайнлар ишламасин, деб топшириқ беришган», — дейди ҳудуд профилактика инспектори Феруз Бўриев.
Феруз Бўриевнинг маълумот беришича, 27 июнь куни эрталаб фермер даласида бўлган туман ҳокими ўринбосари Акром Арипов ИИБ бошлиғига ҳолат ҳақида хабар берган ва Рустам Бозоровнинг комбайни даладан олиб чиқиб кетилиши лозимлигини билдирган. Шунга кўра, фермер комбайни ғалла ўримидан тўхтатилган.
Ушбу суҳбатдан сўнг телефон орқали бизга номаълум шахс билан суҳбатлашган Феруз Бўриев комбайнни олиб кетиш фикри йўқлигини, профилактика инспектори бўлгани учун ўрим жараёнини кузатаётганини айтди ва ҳеч қанча вақт ўтмай фермер хўжалиги даласини тарк этди.
Мазкур ҳолатни изоҳлаган Қарши туман ИИБ бошлиғи Шуҳрат Искандаров фермер комбайни эскилигини, ёнғин хавфсизлиги ходими кўригидан ўтмагани учун жарима майдонига олиб кетишга қарор қилинганини айтди.
«Ғаллани ёнғиндан асраш бизга топширилгани сабаб техник кўрикдан ўтмаган комбайнни далага киритишга йўл қўймаяпмиз. Техник кўрикдан ўтса, бемалол ишлаши мумкин», — деди туман ИИБ бошлиғи.
Рустам Бозоров туман ҳокими ўринбосари Акром Арипов унга қарашли ерни тортиб олиш билан қўрқитганини айтмоқда.
«Акром Арипов ‘ғаллани топширмайдиган бўлсанг, туманда ҳоким ўринбосари бўлиб ишлаб турсам, ерингни тортиб оламан’, дея пўписа қилди. Хўп деб, 25 июнь куни 35 гектар ерга шартнома ҳам туздим ва 87,5 тонна ғалла топширишга рози бўлдим. Аммо ҳокимлик ‘ғалланинг ҳаммасини бизга берасан’ деб талаб қилмоқда», — дейди Рустам Бозоров.
«Дарё» мухбири билан телефон орқали мулоқот қилган Акром Арипов эса фермер Рустам Бозоров энг илғор фермер эканлигини, фермерга ёрдам беришини, ИИБ бошлиғига қўнғироқ қилиб фермерда муаммо йўқлигини айтишини билдирди.
Қарши туманининг Ипак йўли ҳамда Батош ҳудудларида ғалла майдони бор фермер хўжаликлари раҳбарларининг «Дарё»га айтишича, ушбу ҳудудларда ҳам туман ҳокимининг ўзбошимчалиги давом этмоқда.
«Жорий йилдаги режам 134 тонна ғалла эди. Раҳбарлигимдаги фермер хўжалиги 135 тонна ғалла топширди. Шунга қарамай ҳоким икки гектар майдонда қолган ва ишчиларимга ваъда қилинган ғалламни ҳам тортиб олмоқда. Бугун ҳудудимизга бешта комбайн жўнатилган ва қолган ғалламизни ҳам ўриб олади», — дейди «Дилрабо Қувончбек» фермер хўжалиги раҳбари Акром Тангиров.
«Абдулатиф Музаффар» фермер хўжалиги раҳбарининг айтишича, фермернинг жорий йилдаги режаси 168 тонна ғалла топшириш бўлган. Фермер эса 177,2 тонна ғалла топширган. Шунга қарамай, қолган бир гектарга яқин майдондаги ғалласи ҳам ИИБ ходимларининг зўравонлиги билан ўриб олинмоқда.
Фермерларнинг айтишича, ҳоким ғалла режасини бажарган фермер хўжаликларининг ўзига қолаётган ғалласини режани бажармаган фермерларга 1500-1800 сўмдан олиб беришни мақсад қилган ва шу йўл билан режани бажаришни кўзлаган.
«Биздан тортиб олинаётган ғалла ҳозирги нарх 2500-2600 сўмдан олинса рози эдик. Режани бажаролмаган фермерлар ғалламизни 1500-1800 сўмдан сотиб олишни кўзламоқда. Ҳоким эса туман ғалла режасини бажариш учун бизни аямаяпти», — дейди фермер Акром Тангиров.
Изоҳ (0)