2017 йил май ойидан 2018 йил февралгача оралиқда фирибгарлик йўли билан 45 нафар фуқарони чув туширган Тошкент вилоятида яшовчи О.У.га суд ҳукми ўқилди. Бу ҳақда ИИВ ҳузуридаги Тергов департаменти хабар берган.
Хабарда қайд этилишича 33 ёшли О.У. фирибгарлик йўли билан моддий бойлик орттириш мақсадида 2017 йилнинг май ойидан 2018 йилнинг февраль ойигача бўлган вақт мобайнида 45 нафар фуқароларнинг ишончига кириб кредит савдо дўконларидан уларнинг номига кредит шартномаси расмийлаштирган. У турли хилдаги маиший техникаларни олиб, белгиланган миқдордаги кредит тўловларини мунтазам равишда ўз вақтида тўлаб келишини айтиб, алдов йўли билан фуқароларнинг номига олинган маиший техника воситаларини бошқаларга сотиб юборган. О.У. пулларни ўзининг шахсий эҳтиёжларига сарфлаб юбориб, фуқароларга қарийб бир йил давомида жами 150 миллион сўм моддий зарар етказган.
Ҳолат юзасидан Чирчиқ шаҳар ИИБ ҳузуридаги Тергов бўлими томонидан О.У. га нисбатан 168-моддаси 2-қисми «б» банди билан жиноят иши қўзғатилиб, дастлабки тергов жараёнида О.У. Жиноят кодексининг 168-моддаси 3-қисми «а» банди билан айбланувчи тариқасида жалб қилиниб, унга нисбатан қамоққа олиш тарзидаги эҳтиёт чораси қўлланилган. Иш айблов хулосаси билан шаҳар прокуратурасига юборилган.
Жиноят ишлар бўйича Чирчиқ шаҳар судининг ҳукми билан О.У. Жиноят кодексининг 168-моддаси 3-қисми «а» банди билан айбли деб топилиб, унга нисбатан 5 йил 5 ой муддатга озодликдан маҳрум қилиш жазоси тайинланган.
Изоҳ (0)