Uzbekistan Airways компанияси 2020 йил 1 июлдан авиачипталар ва хизматлар учун тўланган суммалар қайтарилишининг янги қоидаларини жорий қилди. Бу ҳақда компания томонидан хабар берилди.
Маълум қилинишича, йўловчилар томонидан авиачипталар ва қўшимча хизматлар учун 2020 йил 31 декабргача тўланган суммани қайтаришни таъминлаш учун 2020 йил 1 июлдан депозит ваучерларни расмийлаштириш амалга оширилади.
Депозит ваучерини расмийлаштиришда қайтарилиши лозим бўлган чипта нархи суммасига авиачиптани харид қилган жой бўйича шу сумманинг 5 фоизга тенг бонус қўшиб берилади.
Компания томонидан қайд этилишича, депозит ваучерлари уларни расмийлаштириш санасидан бошлаб бир йил давомида йўловчилар томонидан Uzbekistan Airways’нинг рейсларидаги ҳар қандай бошқа ташув тўловлари ёки қўшимча хизматлар тўловлари учун фойдаланилиши мумкин.
Ваучерни расмийлаштириш санасидан бир йил ўтиши билан депозитнинг фойдаланилмаган суммаси йўловчига тўлов шаклида қайтарилади.
Таъкидланишича, депозит ваучерларини қўллаш Президент раислигида Вазирлар Маҳкамасининг карантин даврида транспорт тизими барқарорлигини таъминлаш масалалари бўйича 2020 йил 25 майдаги йиғилиши қарори асосида киритилмоқда.
Изоҳ (0)