O‘zbekiston Prezidentining farmoyishiga asosan Prezident administratsiyasi ijro etuvchi apparatida bir qator tayinlovlar amalga oshirildi. Bu haqda O‘zA xabar berdi.

Farmoyishga ko‘ra, Dilnoza Ziyomuhamedova Ommaviy axborot vositalari, televideniye va matbuotni rivojlantirish sho‘basi mudiri lavozimiga tayinlandi. Shuningdek, Dilnoza Ziyomuhamedovaga Prezident administratsiyasi rahbarining o‘rinbosari vazifasini vaqtincha bajarish ham topshirildi.

Mazkur tayinlovgacha Dilnoza Ziyomuhamedova Axborot va ommaviy kommunikatsiyalar agentligining Ommaviy kommunikatsiyalar masalalari bo‘yicha markazi boshlig‘i lavozimida ishlab kelgan.

G‘ulomjon Samadov Prezident administratsiyasi ijro etuvchi apparatining Tadbirlar yoritilishini tayyorlash sho‘basi mudiri lavozimini egalladi.

G‘ulomjon Samadov shu paytga qadar Xalqaro press-klub bosh prodyuseri sifatida faoliyat olib borayotgandi.

Nosirjon Jo‘rayev ijro apparatining Tahliliy materiallarni tayyorlash va administratsiya bo‘linmalari faoliyatini muvofiqlashtirish sho‘basi yetakchi konsultanti lavozimiga tayinlangan va shu munosabat bilan Ommaviy axborot vositalari, televideniye va matbuotni rivojlantirish sho‘basi mudiri lavozimidan ozod etilgan.

Avvalroq Prezident administratsiyasi rahbari o‘rinbosari lavozimida ishlab kelgan Farhod Mahmudov O‘zbekiston Milliy teleradiokompaniyasi raisining birinchi o‘rinbosari etib tayinlangani haqida xabar berilgandi.

Shuningdek, Milliy mass-mediani qo‘llab-quvvatlash va rivojlantirish jamoat fondi direktori, bloger Xushnudbek Xudoyberdiyev O‘zbekiston Milliy axborot agentligi bosh direktori o‘rinbosari etib tayinlandi.