Блогер Хушнудбек Худойбердиев Ўзбекистон Миллий ахборот агентлиги бош директори ўринбосари этиб тайинланди

Миллий масс-медиани қўллаб-қувватлаш ва ривожлантириш жамоат фонди директори, блогер Хушнудбек Худойбердиев Ўзбекистон Миллий ахборот агентлиги бош директори ўринбосари этиб тайинланди. Бу ҳақда Миллий масс-медиани қўллаб-қувватлаш ва ривожлантириш жамоат васийлик кенгаши раиси Комил Алламжонов маълум қилди.

«ЎзА бош директорининг ўринбосари этиб тайинланган блогер ва Масс-медиа фонди директори Хушнудбекни янги масъулиятли лавозим билан табриклайман. Бирга жуда самарали меҳнат қилдик. Ишонаманки, сизнинг ҳаракатларингиз билан ЎзА янги даражага кўтарилади. Сиз у ташкилотга ҳақиқий янги қон бўлиб кираётганингизга ишонаман. Янгилик қилиш осон бўлмайди, тайёр туринг. Омад!», — дея ёзган Комил Алламжонов ўзининг Telegram’даги каналида.

Маълум бўлишича, Хушнуд Худойбердиев 2013 йилдан буён ЎзА бош директорининг ўринбосари лавозимда ишлаб келган Жуманазар Мелиқулов ўрнини эгаллаган.

Тайинловга қадар Хушнуд Худойбердиев Миллий масс-медиани қўллаб-қувватлаш ва ривожлантириш жамоат фонди директори сифатида ишлаб келаётганди.

Ўзбекистон Миллий ахборот агентлиги республика ҳаётига оид ижтимоий-сиёсий ахборотларни тарқатувчи расмий ахборот агентлиги саналади.

ЎзАнинг асосий вазифалари ва фаолиятининг устувор йўналишларига мамлакат ижтимоий-сиёсий ҳаётига оид расмий маълумотларни излаш, олиш, қайта ишлаш ҳамда таҳлилий-танқидий материаллар тайёрлаш ҳисобланади. Шунингдек, агентлик қонунлар, Президент қарорлари, расмий баёнотлари ва маърузаларини, шунингдек, Олий Мажлис палаталари ва ҳукуматининг қарорларини эълон қилади ва ёритади.

ЎзА бош директори ва унинг ўринбосарлари Ўзбекистон Президенти билан келишилган ҳолда Вазирлар Маҳкамаси томонидан лавозимга тайинланади ва лавозимидан озод қилинади.

2019 йилнинг декабрь ойида Президент қарори билан ЎзАнинг вазифалари янгиланган. Агентлик қошида маслаҳат кенгаши ва медиа марказ ташкил этиш режалаштирилган. 2020 йилнинг февраль ойида ЎзА унга янги қурилмалар сотиб олиш ва янги портални ишга тушириш учун 5,4 миллиард сўм ажратишни кўзда тутувчи ҳукумат қарорини жамоатчилик муҳокамасига қўйганди.