26 июнь куни соат 05:10 да Мирзо Улуғбек туманидаги кичик ҳалқа автомобиль йўлида содир бўлган йўл-транспорт ҳодисаси оқибатида мотоцикл ҳайдовчиси ҳалок бўлди. Бу ҳақда Тошкент шаҳар ИИББ ахборот хизмати хабар берди.
Маълумотларга кўра, 35 ёшли Б.С. бошқарувидаги Yamaha YZFR6 русумли мотоцикл ва 46 ёшли Х.У. бошқарган Shacman юк автомобили ўзаро тўқнашув содир этган.
Ҳозирда йўл-транспорт ҳодисаси сабаблари аниқланмоқда. Дастлабки тахминларга кўра, юк автомобили ҳайдовчиси тўсатдан йўналишни ўзгартирган ва бурилиш вақтида ҳаракат устуворлигига эга бўлган мотоциклни пайқамай қолган.
Тўқнашув оқибатида мотоцикл ҳайдовчиси тан жароҳатлари олиб, воқеа жойида ҳаётдан кўз юмган.
Ушбу факт асосида Жиноят кодексининг 266-моддаси («Транспорт воситалари ҳаракати ёки улардан фойдаланиш хавфсизлиги қоидаларини бузиш») 2-қисмига мувофиқ жиноий иш қўзғатилган.
Аввалроқ Ўзбекистонда 2020 йилнинг биринчи чорагида неча киши ЙТҲ қурбонига айлангани маълум қилинган эди.
Изоҳ (0)