Ўзбекистон Президентининг «Ўзбекистон Республикасида «Фольксваген» енгил тижорат автомобиллари ишлаб чиқаришни ташкил этиш лойиҳасини амалга ошириш чора-тадбирлари тўғрисида»ги қарори имзоланди. Бу ҳақда Адлия вазирлиги хабар берди.
Қарор билан «Жиззах автомобиль заводи МЧЖ негизида» Ўзбекистон енгил тижорат автомобилларини ишлаб чиқаришни ташкил этиш» инвестиция лойиҳасини амалга оширишни давом эттириш бўйича Volkswagen компанияси томонидан таклиф этилаётган концепция маъқулланди.
Концепцияда, лойиҳани икки босқичда амалга ошириш кўзда тутилган.
Биринчи босқичда, 2020—2021 йилларда бозорни ўрганиш ҳамда маркетинг таҳлилини ўтказиш мақсадида Volkswagen ва Skoda маркаларидаги тайёр автомобилларни Ўзбекистонга етказиб бериш кўзда тутилган. Шунингдек, компаниянинг юқори малакали мутахассисларини жалб қилган ҳолда «Жиззах автомобиль заводи» МЧЖ ходимларини йирик узелли автомобилларни йиғиш бўйича ўқитишни ташкил этилади
Биринчи босқич доирасида Volkswagen Caddy моделини йирик узелли йиғишни ташкил этиш мақсадида бутловчи қисмлар етказиб берилади. Мамлакатнинг барча ҳудудларида дилерлик тармоғи ва сервис хизматларини кўрсатиш станцияларини ташкил этилади.
Иккинчи босқичда 2022 йилдан бошлаб енгил тижорат автомобилларининг замонавий моделларини ишлаб чиқаришнинг тўлиқ циклини ўзлаштириш назарда тутилган
Қарорга кўра, 2020 йил июль ойидан бошлаб Қорақалпоғистон Республикаси, вилоятлар ва Тошкент шаҳрида Евро-5 стандарти талабларига жавоб берадиган юқори сифатли дизель ёқилғиси ва автобензинга эга камида битта автомобилларга ёқилғи қуйиш шохобчаси бўлиши таъминланади.
Аввалроқ 2020 йилнинг июль ойидан Ўзбекистонда Volkswagen Caddy автомобилларини ишлаб чиқариш ва унинг сотуви бошланиши ҳақида хабар берилганди.
Изоҳ (0)