Ўзбекистон Суперлигаси 6-туридан ўрин олган «Қўқон-192» ва «Сурхон» жамоалари ўртасидаги ўйиндан (3:0) сўнг ҳар икки жамоа бош мураббийлари иштирокида матбуот анжумани ўтказилди.
Дастлаб, меҳмонлар устози Баҳром Ҳайдаров ўйин ҳақидаги фикрларини билдириб ўтди.
«Майдонда бугун икки тенг кучга эга бўлган жамоалар ҳаракат қилди, деб ўйлайман биринчи бўлимда. Ким биринчи бўлиб гол урса, ўша жамоа ғалаба қозониши кўриниб турганди. Бу нарсага қўқонликлар эришишди ва майдон эгалари ғалаба қозонди.
Биринчи гол режаларимизни ўзгартириб юборди. Суперлигада ҳар бир баҳсда ғалаба қозонишимиз мумкин. Бизда иккита тенг кучли таркиб бор. Ҳамма ўз майдонида ғалаба қозонишни ўйлайди. «Пахтакор» билан ўйинда ҳам яхши натижага эришишни истаймиз. Мағлубиятга учраётганимизга қандайдир сабаблар бордир. Лекин жамоамиз керакли очколарни олишига ишонаман», — дейди Ҳайдаров.
Сўнгра «Қўқон-1912» бош мураббийи Бахтиёр Ашурматов ўз фикрлари билан ўртоқлашди.
«Сурхон» билан бўладиган ўйинни мураббий сифатида ҳаяжон билан кутаётгандим. Негаки, термизликлар сафида Шавкат Саломов, Александр Касян, Ҳусниддин Ғофуров, Бубаня каби кўплаб тажрибали ўйинчилар бор эди. Бундай футболчилар ҳар қандай жамоани кучайтиришга қодир деб ўйлайман.
Лекин бугун шогирдларим ўзларини нималарга қодир эканлигини кўрсатди. Бунинг учун уларга ўз миннатдорчилигимни изҳор этаман. Бундай йигитлар билан ҳар қанча фахрлансак арзийди. Чунки, ҳаво иссиқ бўлишига қарамай, ғалаба учун борларини бериб ўйнади. Футболчилар жисмоний ҳолатлари яхши эканлигини намойиш этди. Кейинги ўйинлар ҳам шундай темпни сақлаб қолишга ҳаракат қиламиз», — дейди Ашурматов.
Мазкур ғалабадан кейин «Қўқон-1912» очколари сонини 12 тага етказиб, мусобақа жадвалида иккинчи ўринга кўтарилиб олган бўлса, «Сурхон»нинг очколари (4) ўзгаришсиз қолди. Жамоа 11-поғонадан жой олган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)