Ўзбекистон Республикаси норматив-ҳуқуқий ҳужжатлар лойиҳалари муҳокамаси порталида «Жиноят ва жиноят-процессуал кодексларига ўзгартиш ва қўшимчалар киритиш ҳақида»ги қонун лойиҳаси муҳокамага қўйилди.
Унга кўра Жиноят кодекси 185-модда 3-қисм билан тўлдирилади.
«185-модда, 3-қисми. Ўйинга ёки унинг натижасига таъсир ўтказиш мақсадида келишилган ўйинлар ўтказиш ва уларда иштирок этиш
- Спорт ўйинлари жараёни ёки унинг натижасига ноқонуний таъсир ўтказиш мақсадида спортчи, спорт ҳаками, мураббийи, спорт жамоаси раҳбари, бошқа иштирокчи ёки расмий спорт мусобақаси ташкилотчиси, шу жумладан, уларнинг раҳбар ва мутахассис ходимларига моддий қимматликлар бериш, мулкий манфаатдор этиш орқали ёки бошқа тарзда келишилган ўйинларни ташкил этиш ёки уларда иштирок этиш — бир йилгача муайян ҳуқуқдан маҳрум қилиб, базавий ҳисоблаш миқдорининг эллик бараваридан юз бараваригача миқдорида жарима ёки уч юз олтмиш соатгача мажбурий жамоат ишлари ёки икки йилгача ахлоқ тузатиш ишлари ёки бир йилдан уч йилгача озодликни чеклаш ёхуд бир йилдан уч йилгача озодликдан маҳрум қилиш билан жазоланади.
- Расмий спорт мусобақаси жараёни ёки унинг натижасига ноқонуний таъсир ўтказиш мақсадида спортчи, спорт ҳаками, тренери, спорт жамоаси раҳбари, бошқа иштирокчи ёки расмий спорт мусобақаси ташкилотчиси, жумладан, уларнинг раҳбар ва мутахассис ходимлари томонидан моддий қимматликлар олиш, мулкий манфаатдор бўлиш ёки бошқа тарзда келишилган ўйинларни ташкил этиш ёки уларда иштирок этиш — бир йилгача муайян ҳуқуқдан маҳрум қилиб, базавий ҳисоблаш миқдорининг эллик бараваридан юз бараваригача миқдорида жарима ёки уч юз олтмиш соатгача мажбурий жамоат ишлари ёки икки йилгача ахлоқ тузатиш ишлари ёки бир йилдан уч йилгача озодликни чеклаш ёхуд бир йилдан уч йилгача озодликдан маҳрум қилиш билан жазоланади.
- Айни ҳаракатлар такроран ёки хавфли рецидивист томонидан ва бир гуруҳ шахслар томонидан олдиндан тил бириктириб содир этилган бўлса — уч йилгача муайян ҳуқуқдан маҳрум қилиб, базавий ҳисоблаш миқдорининг юз эллик бараваридан икки юз бараваригача миқдорда жарима ёки уч йилдан беш йилгача ахлоқ тузатиш ишлари ёки уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.
Шунингдек, саккизинчи бобдаги «Қимор ва таваккалчиликка асосланган бошқа ўйин» атамасидаги «казино» сўзидан кейин «букмекерлик» сўзи билан тўлдирилади.
Эслатиб ўтамиз, 2019 йилнинг декабрь ойида «Ўзбекистонда футболни ривожлантиришни янги босқичга олиб чиқиш чора-тадбирлари тўғрисида»ги Президент фармони имзоланган. Унга кўра, Ўзбекистон ҳудудида 2021 йилнинг 1 январидан бошлаб букмекерлик канторалари фаолиятига рухсат берилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)