Урганч туманида 22 ёшли қизнинг интим суратларини ижтимоий тармоқларда тарқатиб юбориш билан қўрқитиб, пул талаб қилган йигит ушланди. Бу ҳақда Хоразм вилояти ИИБ ахборот хизматига таяниб «Xabar.uz» хабар берди.
Маълумотларга кўра, Урганч туманида яшовчи М.А. исмли аёл 24 июнь, чоршанба куни Хоразм вилояти ИИБ бошлиғи номига ариза билан мурожаат қилган. У ўз аризасида 1998 йилда туғилган қизнинг интим расмларини қўлга киритган, Урганч туманида яшовчи 30 ёшли фуқаро Ш.Р. ижтимоий тармоқлар орқали ушбу расмларни тарқатиб юбориш билан таҳдид қилаётганини билдирган.
Таъкидланишича, Ш.Р. шу пайтгача 9,6 миллион сўм миқдорида пул ва қимматбаҳо уяли телефонни олган бўлса-да, яна 15,8 миллион сўм миқдоридаги пулни товламачилик йўли билан талаб қилган.
Мазкур мурожаатни ўрганиш учун Хоразм вилояти ИИБ ЖҚБ иқтисодий жиноятларга қарши курашиш бўлими ходимлари томонидан ўтказилган тезкор тадбир жараёнида Ш.Р. талаб қилинган суммадаги пулни олаётган пайтда ашёвий далиллар билан қўлга олинган.
Ҳозирда ушбу шахсга нисбатан Бош прокуратура ҳузуридаги Иқтисодий жиноятларга қарши курашиш департаменти Хоразм вилояти бошқармаси томонидан терговга қадар текширув ҳаракатлари олиб борилмоқда.
Аввалроқ Хивада ишқий саҳналар тасвирланган видеони интернетга тарқатмаслик учун 1 миллиард сўм талаб қилган шахс қўлга олингани тўғрисида хабар берилганди.
Изоҳ (0)