Миллий гвардия ходими Зарафшон дарёсининг Самарқанд шаҳридан оқиб ўтувчи қисмида сувга чўкиб кетаётган аёлни қутқариб қолди. Бу ҳақда Миллий гвардия Самарқанд вилояти Қўриқлаш бошқармаси ахборот хизматига таяниб, «Kun.uz» хабар берди.
Маълумотларга кўра, дарё устидаги кўприк яқинида турган Миллий гвардия қўриқлаш бошқармаси 1-алоҳида баталёни сафдор ходимлари А.Раббонов ҳамда Ф.Қаршиев соат 9:20 лар атрофида тўлқинлар ичида одам овози эшитилаётганини пайқаб қолган.
Дарё ҳудуди кўздан кечирилганда, аёл киши сувга чўкиб кетаётгани маълум бўлган. Шунда ходимлар зудлик билан дарёга шўнғиб, аёлни қирғоққа олиб чиқишга муваффақ бўлган. Шошилинч равишда тез ёрдам чақирилган, улар етиб келгунга қадар биринчи тиббий ёрдам ҳам кўрсатилган.
«Шундай қилиб, дарёда чўкишига бир баҳя қолган инсон ҳаёти сақлаб қолинди. Айни вақтда фуқаро Республика шошилинч тез тиббий ёрдам Самарқанд филиали 3-хирургия бўлимига ётқизилган бўлиб, шифокорлар назоратига олинган. Ҳозирда ҳолат юзасидан суриштирув ишлари олиб борилмоқда», — дейилади хабарда.
Изоҳ (0)