Шаҳрисабз давлат музей-қўриқхонаси бош директори Н.Х. ўз рафиқаси ва ишламаган тўрт нафар ходим номига иш ҳақи ёзиб, 62,9 миллион сўмни ўзлаштиргани ҳақида аввалроқ хабар берилганди. Маданият вазирлиги мазкур хабарга муносабат билдирди ва уни рад этди.
Вазирлик томонидан маълум қилинишича, музей назоратчиси Одил Таниқулов Шаҳрисабз прокуратурасига ариза билан мурожаат этган. Мазкур ариза асосида текширув ўтказилган.
Таъкидланишича, филология фанлари номзоди, профессор Поян Равшанов билан тузилган меҳнат шартномасига кўра, у музейга илмий ходим штатига ярим ставкага ишга олинган. Профессорнинг иш йўриқномаси ва меҳнат шартномасида унга илмий иш қилиш, илмий мақолалар ва китоб ёзиш юклатилган. У масофадан Қарши шаҳридаги кутубхоналар, архив ва ўзининг шахсий кутубхоналаридан фойдаланиб, музей директори, тарих фанлари номзоди Наби Хушвақов билан илмий ҳамкорликда 261 бетдан иборат «Қашқадарё тарихига саёҳат» мавзусида илмий оммабоп китоб чиқариб, вазифасини бажарган.
«Одатда илмий ходимларнинг бир йиллик иш режасида 25 бетлик илмий мақола назарда тутилган бўлса, у бир ярим йилда вазифасини тўрт баробар зиёд бажарган ҳисобланади. Аммо молия бўлими мутахассиси бу ишларни фарқига бормай, «ишга келмаган, ойлик маош олган», деб акт далолатнома ёзган. Ваҳоланки, у зарурий вақтларда келган, илмий конференцияларда раислик қилган ва ойлик маошини пластик карта орқали олган. Унинг пластик картаси ўз қўлида. Бу ерда давлат маблағини ўзлаштириш ҳолати йўқ», — дейилади вазирлик муносабатида.
Қайд этилишича, Қашқадарё вилояти тарихи ва маданияти давлат музейи директори Баҳодир Мамадиев ҳам ярим ставкада музейда ишлаган ва у вазирлик ва вилоят ҳокимлиги томонидан берилган топшириқларга асосан янги ташкил этилаётган музейлар, экспозициялар ва маданий мерос объектларини таъмирлаш ва консервация қилиш бўйича илмий концепциялар ҳаммуаллифи ҳисобланади. «У Яккабоғ туманидаги Хўжаилғор музей мажмуаси илмий концепцияси, Мудофаа тарихи музейи концепцияси, Қамаши туманидаги Лангар ота мажмуасидаги тарихий масжидни таъмирлаш илмий концепцияси, Кеш тарихи ва маданияти илмий концепциясини яратишда фаол иштирок этган. Бундан ташқари, музейларнинг саёҳатчилар учун шанба ва якшанба кунларида ишлаши ва иш режимини соат 22:00 гача чўзиш бўйича топшириқларини бажаришда фаол иштирок этган. Унинг илмий ҳисоботлари музей архивида сақланмоқда. Ойлик маошини ўзи олган ва фойдаланган», — дея таъкидланади вазирлик хабарида.
Вазирликнинг маълум қилишича, яна бир ходим — Беҳруз Бобожонов Қарши давлат университетининг бакалавриатини 2018 йилда тугатгач, музейга илмий ходим лавозимига ишга олинган. У 2019 йилнинг декабрь ойида шу университетнинг магистратурасига ўқишга кирган. У Қарши давлат университетида душанба ва сешанба кунлари ўқишда бўлган, Шаҳрисабздан қатнаб ўқиган ва илмий тадқиқот ишлари музей фондидаги материалларга асосланган. «Бундан ташқари, шу 2 йилда 3 та илмий мақоласини нашр этган. Магистрлик диссертацияси музей фонди материалларига асосланган. Олий ва ўрта махсус таълим вазирлигининг низомида мутахасислиги ва ихтисослиги бўйича талабалар учун ишга киришга рухсат берилган ва ставкалари чекланмаган. Яъни қонун унинг бир ставка ишлашига монелик қилмайди», — дейилади вазирлик томонидан.
Вазирликнинг таъкидлашича, директорнинг турмуш ўртоғи Дилбар Ваҳобова музейда 20 йилдан буён турли лавозимларда ишлаб келмоқда. У Бухоро давлат университетидаги музейшуносларнинг малакасини ошириш курсини тугатгач, методист лавозимига ўтказилган. Қайд этилишича, Дилбар Ваҳобова ўз тушунтириш хатида гоҳида боши оғриб, кадрлар бўлимидан рухсат олиб кетганини ёзган, бироқ бу «умуман ишга келмай ойлик олган», деб талқин этилган. Ҳамкасбларининг Дилбар Ваҳобова ўз вақтида ишга келиши ва кетишини тасдиқлаб ёзган тушунтириш хатлари инобатга олинмаган.
«Аризачи Одил Таниқулов 20 июнь куни Шаҳрисабз шаҳар прокурорига ‘қизишиб, нотўғри маълумотлар ёзганини, ҳозирги кунларда Наби Хушвақов билан ярашганини ва аризасини оқибатсиз қолдиришларини сўраб’ ёзган аризаси инобатга олинмаган», — дейилади вазирлик изоҳида.
Вазирликнинг билдиришича, терговга қадар текширув Бош прокуратуранинг Шаҳрисабз шаҳар бўлими томонидан ўтказилганлиги муносабати билан бир ёқлама тарзда олиб борилгани учун музей раҳбарияти ва алоқадор ходимлар акт-далолатномаларини тасдиқламаган.
Шунингдек, вазирлик мазкур ҳолат бўйича ОАВда берилган хабарлар нотўғри маълумот эканлигини билдирган.
Изоҳ (0)