Осиё тараққиёт банкининг директорлар кенгаши 2020 йил 25 июнь куни коронавирус пандемиясининг иқтисодиётга салбий таъсирини камайтириш учун Ўзбекистонга 500 миллион доллар миқдоридаги имтиёзли кредит маблағларини ажратиш бўйича қарорни маъқуллади. Бу ҳақда Молия вазирлиги ахборот хизмати хабар берди.
Маълум қилинишича, 500 миллион доллар миқдоридаги имтиёзли қарз маблағлари 15 йил муддатга, шундан 3 йиллик имтиёзли давр билан ажратилмоқда.
Жалб қилинаётган маблағлар Ўзбекистон Молия вазирлиги ҳузуридаги Инқирозга қарши курашиш жамғармаси ва давлат бюджетига коронавирус пандемияси ва глобал инқирознинг салбий таъсирини камайтириш чораларини молиялаштириш мақсадида йўналтирилади.
Инвестициялар ва ташқи савдо вазирлигининг маълум қилишича, мазкур маблағлардан ўпкани сунъий нафас олдириш аппаратлари, тест тизимлари, шахсий ҳимоя воситаларини сотиб олиш ҳамда соғлиқни сақлаш соҳасида фаолият юритаётган аёлларга алоҳида ижтимоий пакетлар бериш учун ҳам фойдаланилади.
Ушбу молиявий ёрдам минтақавий техник ёрдам доирасида ОТБ томонидан Ўзбекистон ҳукуматига илгари тақдим этилган 1,5 миллион доллар миқдоридаги грант маблағларига қўшимча кўмак ҳисобланади.
Эслатиб ўтамиз, Ўзбекистон коронавирусга қарши кураш учун Осиё тараққиёт банкидан 1 миллиард доллар сўраганди. Кейинроқ ОТБ Ўзбекистонга COVID-19 билан курашиши учун 1,36 миллион доллар ажратгани маълум бўлди.
Маълумот учун, Ўзбекистонда коронавирус сабабли юзага келадиган иқтисодий муаммоларга қарши курашиш учун Инқирозга қарши жамғарма тузилиб, унга 10 триллион сўм ажратилиши маълум қилинган. Ўзбекистон Президентининг 22 апрелда имзолаган қарорига кўра, пандемия оқибатларини камайтириш учун 2020 йилда 3,1 миллиард доллар жалб қилиш режалаштирилган.
Халқаро валюта жамғармаси Ўзбекистонга 375 миллион доллар миқдорида кредит ажратишга розилик берди ва бунинг учун қўшимча шарт қўймаслигини маълум қилди, кейинроқ мазкур кредит жамғарма томонидан маъқулланди.
Жаҳон банки томонидан коронавирусга қарши кураш учун Марказий Осиёга ажратилган 370 миллион долларнинг асосий қисми Ўзбекистонга насиб этди.
Европа тикланиш ва тараққиёт банки Ўзбекистон банкларига ёрдам тариқасида 220 миллион доллар, Ўзбекистон компанияларини қўллаб-қувватлаш учун 150 миллион доллар ажратиши маълум қилинган.
АҚШ Халқаро тараққиёт агентлиги (USAID) коронавирусга қарши кураш учун Ўзбекистонга февраль, март ва апрель ойларида ёрдам кўрсатди. АҚШ Касалликларни назорат қилиш ва олдини олиш маркази (CDC/CAR) Марказий Осиё ҳукуматларининг COVID-19’га қарши саъй-ҳаракатларини қўллаб-қувватлаш мақсадида 6,8 миллион доллар ажратди, бунинг 2,07 миллион доллари эса Ўзбекистонга берилди. Шунингдек, COVID-19 пандемиясига қарши кураш бўйича комплекс чора-тадбирлар доирасида АҚШ ҳукумати USAID орқали Ўзбекистонга қўшимча 3 миллион доллар ажратиши маълум қилинди. USAID 5 июнь куни Ўзбекистон Санитария-эпидемиологик осойишталик агентлигига коронавирус тести ўтказиш учун зарур воситаларни етказиб берди. Бундан ташқари, АҚШ ҳукумати USAID орқали COVID-19 пандемияси даврида Марказий Осиёда муҳожирларни ҳимоя қилиш учун 2 миллион доллар ажратишни режалаштирган.
Изоҳ (0)