Сардоба фалокатидан зарар кўрган 1828 та уй таъмирланди, 32 та кўприк қайта тикланди

Сирдарё вилоятидаги Сардоба сув омборида юз берган фалокатдан зарар кўрган 1828 та турар жой таъмирланди, 32 та кўприк қайта тикланди. Бу ҳақда Фавқулодда вазиятлар вазирлиги матбуот котиби Мурод Содиқов 25 июнь, пайшанба куни ўтказилган брифингда маълум қилди.

Маълум қилинишича, таъмирлаш ишларига 14 000 дан зиёд ишчи ва 800 та техника жалб қилинган.

Оқолтин, Сардоба ва Мирзаобод туманларида қайта таъмирланаётган 252 та хонадонда ёнғин хавфсизлиги бўйича ўрганиш ишлари олиб борилди. Натижада аниқланган 380 та камчиликдан 282 таси жойида бартараф этилган.

Вазирлик вакилининг сўзларига кўра, мазкур фалокатдан жабрланганлар учун ташкил қилинган 1205 қисқа рақами орқали 8171 та мурожаат келиб тушган. Шундан 8148 таси ижобий ҳал этилган, қолган 23 та мурожаат тегишлилигига кўра ташкилотларга юборилиб, ижроси назоратга олинган.

Талафот кўрган ҳудудларда ҳамда вилоят бўйича 218 та турар жойда 49 550 квадрат метр майдонда дезинфекция тадбири ўтказилган.

Таъкидланишича, зарар кўрган масжид ҳамда қабристонларда таъмирлаш ва тиклаш ишлари тўлиқ якунланган. Халқаро ва давлат аҳамиятидаги йўлларнинг 35 километри ҳамда 32 та кўприк қайта тикланган.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Фавқулодда вазият сабабли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган. Сув тошқини оқибатида 4435 та хонадон талафот кўрган. Улардан 2390 таси яроқсиз ҳолга келган, 2045 таси эса таъмирталаб ҳолатда. Сардоба тумани «Дўстлик» маҳалласида 37 та 1480 хонадонли; Мирзаобод тумани «Ҳақиқат» маҳалласида 20 та 800 хонадонли ва «Навбаҳор» маҳалласида 9 та 360 хонадонли кўп қаватли турар жой қурилиш ишлари бошланган.

15 май куни Президент Шавкат Мирзиёев сардобаликлар билан учрашувда сув тошқини оқибатида зарар кўрган уйлар давлат томонидан бепул таъмирлаб берилишини, уйлари зарарланган одамларнинг илгариги ҳовлилари ҳам ўзларида қолишини маълум қилган эди. Бундан ташқари, шу куни сув тошқинидан жабр кўрган 4,5 мингдан ортиқ хонадон эгаларига 40 миллион сўмлик моддий ёрдам сертификати, маиший техника тўплами учун сертификат ва ичида пул маблағи бўлган банк карточкалари тарқатилиши маълум қилинди.

Бош прокуратура Сардоба фалокати юзасидан жиноят иши бўйича 4 та тергов версиясини кўриб чиқмоқда. Ҳозирда сув омбори иши бўйича икки киши қамоққа олинган.