Покистонда ҳалокатга учраган самолёт учувчилари парвоз вақтида коронавирус муҳокамасига чалғигани маълум бўлди

Жорий йилнинг 22 май куни Покистоннинг Карачи шаҳри аэропортига қўниш вақтида ҳалокатга учраган Pakistan International Airlines авиакомпаниясининг Airbus А320 самолёти учувчилари парвоз вақтида коронавирус пандемиясини муҳокама қилган ва самолёт бошқарувидан чалғиган. Бу ҳақда Покистон ҳукумати томонидан эълон қилинган дастлабки тергов материалларида сўз боради, деб ёзмоқда Meduza.

Самолёт бортидаги овоз ёзувларидан маълум бўлишича, парвоз вақтида учувчилар коронавирус пандемиясини муҳокама қилган. «Уларнинг оилалари жабр кўрган, шунинг учун улар коронавирусни муҳокама қилган», — деди Покистон фуқаро авиацияси вазири Ғулом Сарвар Хон.

Вазирнинг сўзларига кўра, самолёт қўнишга жуда катта баландликдан кира бошлаган, буни диспетчерлар пайқаган ва экипажга хабар қилган, бироқ учувчилар диспетчернинг сўзларини инобатга олмаган.

«Диспетчерлар уларни огоҳлантирган, бироқ у (экипаж командири) ‘Эплайман’, деган, шундан сўнг улар (учувчилар) коронавирусни муҳокама қилишда давом этган», — дея маълум қилди Ғулом Сарвар Хон.

Вазирнинг қайд этишича, учувчилар тажрибали бўлган ва парвоздан олдин барча тиббий текширувлардан ўтган, самолёт ҳам тўлиқ соз ҳолатда бўлган.

Эслатиб ўтамиз, Airbus А320 самолёти 22 май куни Карачи шаҳрига қўнишга иккинчи уринишда аҳоли яшайдиган мавзега қулаган. Бортда бўлган 97 киши ҳалок бўлган. Ерда бўлган тахминан 10 киши турли даражада тан жароҳати олган, улардан бири авиаҳалокатдан бир неча кун ўтиб вафот этган. Шу билан бирга, самолёт бортида бўлган йўловчилардан икки нафари тирик қолган.

Дастлаб авиаҳалокатга самолётнинг қушлар галаси билан тўқнашиб кетгани сабаб бўлиши мумкинлиги ҳамда самолётнинг шасси ғилдиракларида ҳам муаммо кузатилгани ҳақида хабар берилганди.

Расмий маълумотларга кўра, Покистонда 24 июнь ҳолатига кўра, қарийб 189 минг киши коронавирус билан касалланган, 3,7 минг киши касаллик оқибатида вафот этган.