Россияда 24 июнь ҳолатига кўра, коронавирусга чалинган беморлар сони 606 881 кишини ташкил қилмоқда. Сўнгги бир сутка ичида COVID-19 билан касалланиш бўйича 7176 та янги ҳолат қайд этилган. Бир кун аввал эса янги қайд этилган ҳолатлар сони 7425 кишини ташкил қилганди. Бу ҳақда Meduza хабар берди.
Сўнгги бир суткада энг кўп касалланганлар Москва шаҳри (811 киши), Москва вилояти (507 киши), Ханти-Мансиск автоном округи (323 киши), Санкт-Петербург шаҳри (218 киши), Нижегород вилояти (207 киши) ва Воронеж вилоятида (198 киши) қайд этилган.
Россияда коронавирус оқибатида вафот этган беморларнинг умумий сони 8513 кишига етди, сўнгги бир сутка ичида 154 киши касаллик қурбонига айланди. Мамлакатда касалликдан тузалганларнинг умумий сони 368 822 кишини ташкил қилмоқда, бир кун ичида 12 393 киши касалликдан тузалган.
Сўнгги бир сутка ичида коронавирусни аниқлаш бўйича 281 мингта тест ўтказилган. Пандемия бошидан буён ўтказилган тестларнинг умумий сони эса 17,8 миллиондан ошган.
Россияда кунлик аниқланаётган янги касалланиш ҳолатлари сонининг камаяётгани кузатилмоқда. Хусусан, 19 июнь куни 7972 та, 21 июнь куни 7728 та, 22 июнь куни 7600 та, 23 июнь куни 7425 та янги ҳолат ҳақида хабар берилганди.
Аввалроқ Ғалаба парадида қатнашиш учун Москвага борган Қирғизистон делегацияси аъзолари орасида коронавирус аниқлангани ҳақида хабар берилганди.
Изоҳ (0)